Kavitha New Party: డాడీ, మోడీ, చిన్న మోడీలపైనే నా పోరాటం.. కొత్త పార్టీ ప్రకటించిన కవిత!
తెలంగాణ రాజకీయాల్లో మరో సంచలన పరిణామం చోటుచేసుకోబోతోంది. గత కొంతకాలంగా స్తబ్దుగా ఉన్న ఎమ్మెల్సీ కవిత తన రాజకీయ భవిష్యత్తుపై ఎట్టకేలకు పూర్తి క్లారిటీ ఇచ్చారు. త్వరలోనే తాను ఒక నూతన రాజకీయ పార్టీని స్థాపించబోతున్నట్లు ఆమె అధికారికంగా ప్రకటించారు.
మహాత్మా గాంధీ ప్రవచించిన సర్వోదయ సిద్ధాంతం ఆధారంగా తన పార్టీ అజెండా ఉంటుందని, ప్రస్తుతం దానిపై లోతైన అధ్యయనం మరియు కసరత్తు జరుగుతోందని ఆమె వెల్లడించారు. మంచి ముహూర్తం చూసుకుని పార్టీ పేరును త్వరలోనే ప్రకటిస్తానని, ఇప్పటికే పేరు దాదాపు ఖరారైందని, పార్టీ ప్రధాన కార్యాలయం కోసం అనువైన స్థలాన్ని కూడా అన్వేషిస్తున్నామని కవిత వివరించారు.
నా పోరాటం వారిపైనే.. కాంగ్రెస్కు కౌంటర్
తాను ఎవరిపై పోరాటం చేయబోతున్నానో కవిత చాలా స్పష్టంగా, సూటిగా చెప్పారు. డాడీ, మోడీ, చిన్న మోడీ పైనే తన ప్రధాన పోరాటం ఉంటుందని ఆమె సంచలన ప్రకటన చేశారు. ఈ విషయంలో తనకు ఎవరితోనూ రాజీ పడే ప్రసక్తే లేదని, తన కొత్త పార్టీ ప్రజల మద్దతుతో కచ్చితంగా సక్సెస్ అవుతుందని ఆమె ధీమా వ్యక్తం చేశారు.
ఇక బీఆర్ఎస్ పార్టీతో తనకు వచ్చిన గ్యాప్ మరియు ఇతర సమస్యలను కాంగ్రెస్ పార్టీ, ముఖ్యంగా సీఎం రేవంత్ రెడ్డి తమ రాజకీయ ప్రయోజనాల కోసం వాడుకుంటున్నారని కవిత తీవ్రంగా ఆరోపించారు. శాసనసభలో సైతం కాంగ్రెస్ నేతలు తన ఇష్యూను అడ్వాంటేజ్గా తీసుకుని వ్యవహరిస్తుండటం పట్ల ఆమె తీవ్ర అసహనం వ్యక్తం చేశారు.
శ్రీరామనవమి తర్వాత ప్రకటన.. యువతకే పెద్దపీట
రాబోయే శ్రీరామనవమి పండుగ తర్వాత తన కొత్త పార్టీ అధికారిక ప్రకటన ఉంటుందని కవిత స్పష్టం చేశారు. అంతకంటే ముందే ఢిల్లీ వెళ్లి తనకు సత్సంబంధాలు ఉన్న జాతీయ స్థాయి నాయకులను కలుస్తానని, వారి మద్దతు కూడా కూడగడతానని ఆమె తెలిపారు. తెలంగాణ మలిదశ ఉద్యమంలో చురుగ్గా పనిచేసిన యువతకు తన కొత్త పార్టీలో అత్యధిక ప్రాధాన్యత ఉంటుందని హామీ ఇచ్చారు.
తనకు ఎలాంటి బేషజాలు లేవని, అందరినీ కలుపుకుని ముందుకు వెళ్తానని ప్రకటించారు. నూతన పార్టీ ప్రభావం ముఖ్యంగా ఆదిలాబాద్, నిజామాబాద్, ఖమ్మం జిల్లాల్లో బలంగా ఉంటుందని ఆమె అంచనా వేశారు. ఉత్తర, దక్షిణ తెలంగాణ అనే తేడా లేకుండా రాష్ట్రవ్యాప్తంగా అనేక నియోజకవర్గాల నుంచి తనను పోటీ చేయాలని ప్రజలు కోరుతున్నారని, ముఖ్యంగా వనపర్తి నుంచి పోటీ చేయాలని జాగృతి కార్యకర్తలు ఇటీవల తనపై ఒత్తిడి తెచ్చారని కవిత వెల్లడించారు.
Also Read:
Moinabad Farmhouse Case: మొయినాబాద్ డ్రగ్స్ కేసు వేళ నటి హేమ సంచలన వ్యాఖ్యలుTGSRTC Updates: ఆర్టీసీ ఉద్యోగులకు స్పెషల్ ఇంక్రిమెంట్ రద్దు
Jeevan Reddy: ఎమ్మెల్యే సంజయ్పై జీవన్ రెడ్డి ఫైర్
KTR Assembly Speech: కాంగ్రెస్ సర్కార్ పై కేటీఆర్ ఫైర్
Mahesh Goud: కేటీఆర్ డ్రగ్ టెస్ట్కు సిద్ధమా? పీసీసీ సవాల్
