Renu Desai: సోషల్ మీడియా ట్రోల్స్పై సైబరాబాద్ పోలీసుల కొరడా.. రేణు దేశాయ్ను వేధించిన ఇద్దరి అరెస్ట్!
సోషల్ మీడియా వేదికగా సినీ ప్రముఖులను టార్గెట్ చేస్తూ అసభ్యకర వ్యాఖ్యలు చేస్తున్న ఆకతాయిలపై సైబరాబాద్ సైబర్ క్రైమ్ పోలీసులు ఉక్కుపాదం మోపుతున్నారు. తాజాగా ప్రముఖ నటి రేణు దేశాయ్ ఇచ్చిన ఫిర్యాదుపై వేగంగా స్పందించిన పోలీసులు, ఆమెను ఆన్లైన్లో తీవ్రంగా వేధించిన ఇద్దరు వ్యక్తులను అరెస్ట్ చేసి కటకటాల వెనక్కి నెట్టారు.
నాలుగు అకౌంట్లపై పోలీసులకు ఫిర్యాదు
గత కొంతకాలంగా సోషల్ మీడియాలో తనపై వస్తున్న అసభ్యకరమైన కామెంట్లు, వ్యక్తిగత దూషణలపై రేణు దేశాయ్ తీవ్ర అభ్యంతరం వ్యక్తం చేస్తూ వస్తున్నారు. తనపై ఉద్దేశపూర్వకంగా తప్పుడు ప్రచారం చేస్తూ, అశ్లీల పదజాలంతో వేధింపులకు గురిచేస్తున్న మొత్తం నాలుగు సోషల్ మీడియా అకౌంట్ల వివరాలతో ఆమె నేరుగా సైబరాబాద్ సైబర్ క్రైమ్ పోలీసులకు ఫిర్యాదు చేశారు. ఈ వ్యవహారాన్ని అత్యంత సీరియస్గా తీసుకున్న పోలీసులు.. ఆధునిక సాంకేతిక ఆధారాల సాయంతో నిందితులను గుర్తించారు. వారిలో ఇద్దరిని ఇప్పటికే అరెస్ట్ చేయగా, పరారీలో ఉన్న మిగిలిన ఇద్దరి కోసం కూడా గాలింపు చర్యలను ముమ్మరం చేశారు.
ఫేక్ అకౌంట్లతో విర్రవీగితే జైలుకే.. పోలీసుల హెచ్చరిక
చీకట్లో ఉండి ఫేక్ అకౌంట్లతో కామెంట్లు చేస్తే తమను ఎవరూ పట్టుకోలేరని విర్రవీగుతున్న కేటుగాళ్ల ఆటకట్టిస్తామని సైబరాబాద్ పోలీసులు ఈ సందర్భంగా గట్టిగా హెచ్చరించారు. ఆకతాయిలు ఎక్కడ ఉన్నా, ఎంతటి రహస్యంగా వ్యవహరించినా ఐపీ అడ్రస్లు, సాంకేతిక పరిజ్ఞానంతో కచ్చితంగా పట్టుకుంటామని వారు స్పష్టం చేశారు. ఇప్పటికే ప్రముఖ యాంకర్, నటి అనసూయను సోషల్ మీడియాలో వేధించిన కేసులో కూడా ఒకరిని పోలీసులు అరెస్ట్ చేసిన విషయం తెలిసిందే.
వరుసగా జరుగుతున్న ఈ అరెస్టులు సోషల్ మీడియాలో వికృత చేష్టలకు పాల్పడే వారిలో వణుకు పుట్టిస్తున్నాయి. కేవలం సెలబ్రిటీలే కాకుండా సామాన్య మహిళలు కూడా ఇలాంటి ఆన్లైన్ వేధింపులకు గురైతే ఏమాత్రం భయపడకుండా వెంటనే పోలీసులను ఆశ్రయించాలని అధికారులు సూచించారు. ఫిర్యాదు అందిన వెంటనే బాధ్యులపై అత్యంత కఠిన చర్యలు తీసుకుంటామని సైబర్ క్రైమ్ పోలీసులు మహిళలకు పూర్తి భరోసా ఇచ్చారు.
