దేశ అత్యున్నత న్యాయస్థానం పవిత్రమైన హాల్లో జరిగిన విచారణ.. సమాజంలో దశాబ్దాలుగా పాతుకుపోయిన పితృస్వామ్య భావజాలంపై సంధించిన ఒక బ్రహ్మాస్త్రం లాంటిది. వివాహ బంధం అంటే ఆధిపత్యం చెలాయించడం కాదు, ఇద్దరు వ్యక్తులు సమానంగా పంచుకునే జీవిత ప్రయాణం అని సుప్రీంకోర్టు అత్యంత బలంగా నొక్కిచెప్పింది. భార్యను ఇంటి పనులకే పరిమితం చేసే ఒక సంప్రదాయక ఆలోచనా విధానానికి చెక్ పెడుతూ.. జస్టిస్ సందీప్ మెహతా, జస్టిస్ విక్రమ్ నాథ్లతో కూడిన ధర్మాసనం చేసిన సంచలన వ్యాఖ్యలు ఇప్పుడు దేశవ్యాప్తంగా తీవ్ర చర్చనీయాంశంగా మారాయి. విడాకుల కోసం వచ్చిన ఒక దంపతుల కేసును విచారిస్తున్న సందర్భంగా, న్యాయస్థానం పలికిన ప్రతి మాట మహిళల ఆత్మగౌరవాన్ని ఆకాశానికెత్తింది.
జీవిత భాగస్వామి.. మీ ఇంటి సేవకురాలు కాదు!
మారుతున్న కాలంతో పాటు మగవారి ఆలోచనా విధానం కూడా మారాల్సిన ఆవశ్యకతను ధర్మాసనం కోర్టు హాలు సాక్షిగా కుండబద్దలు కొట్టింది. పెళ్లి చేసుకున్నది ఒక జీవిత భాగస్వామినే తప్ప, ఇంటి పనులు చేయడానికి తీసుకొచ్చిన సేవకురాలిని కాదని అత్యంత గంభీరంగా వ్యాఖ్యానించింది. వంట చేయడం, ఇల్లు శుభ్రం చేయడం లాంటి బాధ్యతలను భార్య నిర్వర్తించకపోవడం చట్టం దృష్టిలో ఎట్టి పరిస్థితుల్లోనూ 'క్రూరత్వం' కిందకు రాదని స్పష్టం చేసింది. ఇంటి పనుల్లో భార్యతో పాటు భర్తలు కూడా సమానంగా పాలు పంచుకోవాలని, ఆ సమాన భాగస్వామ్యం ఉన్నప్పుడే ఏ వైవాహిక బంధమైనా కలకాలం పచ్చగా నిలబడుతుందని న్యాయమూర్తులు హితవు పలికారు.
ఆరోపణలు, కన్నీటి వ్యధ.. అసలేం జరిగింది?
ఈ సంచలన వ్యాఖ్యల వెనుక ఒక సుదీర్ఘమైన కుటుంబ వివాదం దాగి ఉంది. 2017లో వివాహం చేసుకున్న ఈ దంపతులకు ఒక ఎనిమిదేళ్ల కుమారుడు ఉన్నాడు. అయితే, పెళ్లయిన వారం రోజులకే తన భార్య ప్రవర్తన మారిపోయిందని భర్త ఆరోపించాడు. తనను, తన తల్లిదండ్రులను దూషించిందని, కనీసం వంట చేసి పెట్టేందుకు కూడా నిరాకరించిందని విడాకుల పిటిషన్లో పేర్కొన్నాడు. బిడ్డకు జన్మనిచ్చిన తర్వాత జరిగిన బారసాల కార్యక్రమానికి కూడా కన్న తండ్రినైన తనను పిలవలేదని తన ఆవేదన వ్యక్తం చేశాడు. కానీ, భర్త చేసిన ఈ ఆరోపణలను సదరు భార్య కోర్టు ముందు తీవ్రంగా తోసిపుచ్చింది. అత్తమామల అనుమతితోనే డెలివరీ కోసం తాను పుట్టింటికి వెళ్లానని, బారసాలకు రావాలని ఆహ్వానించినా అదనపు కట్నం, బంగారం డిమాండ్ చేస్తూ వారు రాలేదని ఆమె కన్నీటి పర్యంతమైంది.
ఫ్యామిలీ కోర్టు నుంచి సుప్రీం మెట్ల వరకు..
వీరిద్దరి మధ్య పచ్చగడ్డి వేస్తే భగ్గుమనే పరిస్థితి ఉండటంతో, మొదట ఫ్యామిలీ కోర్టు విచారణ జరిపి వీరికి విడాకులు మంజూరు చేసింది. కానీ, తనపై వేసిన నిందలను భరించలేక ఆ భార్య హైకోర్టు మెట్లు ఎక్కింది. అక్కడ ఆ మహిళ వాదనలతో ఏకీభవించిన న్యాయస్థానం, ఫ్యామిలీ కోర్టు ఇచ్చిన విడాకుల తీర్పును పక్కనబెట్టి ఆమెకు అనుకూలంగా తీర్పునిచ్చింది. దీంతో ఏడేళ్ల వైవాహిక బంధాన్ని తెంచుకోవాలన్న పట్టుదలతో ఆ భర్త చివరకు సుప్రీంకోర్టును ఆశ్రయించాడు. వీరిద్దరి మధ్య రాజీ కుదిర్చేందుకు సుప్రీంకోర్టు గతంలోనే వీరిని మధ్యవర్తిత్వానికి (Mediation) పంపినా ఫలితం లేకుండా పోయింది. ఈ నేపథ్యంలో శుక్రవారం మరోసారి విచారణ చేపట్టిన సుప్రీంకోర్టు ధర్మాసనం.. తదుపరి విచారణకు భార్యాభర్తలిద్దరూ స్వయంగా కోర్టుకు హాజరుకావాలని కఠిన ఆదేశాలు జారీ చేసింది.
Also Read:
Air India Crash Report: ఎయిరిండియా విమాన ప్రమాదంపై సంచలనం.. 11 ఏళ్లుగా అదే లోపం!Russian Oil to India: చైనాకు వెళ్తున్న 7 రష్యా ఆయిల్ ట్యాంకర్లు ఇండియాకు మళ్లింపు.. అసలేం జరుగుతోంది?
Tamil Nadu Elections: అమిత్ షాతో త్రిష చర్చలు? పొత్తుల వార్తలపై క్లారిటీ ఇచ్చిన విజయ్
Flight Seat Selection: విమాన ప్రయాణికులకు గుడ్ న్యూస్
Supreme Court Orders: ఆర్బీఐ, కేంద్ర ప్రభుత్వానికి సుప్రీంకోర్టు కీలక ఆదేశాలు.. చట్టపరమైన వారసులకు న్యాయం జరిగేనా?
