Russia Oil Tankers: చైనాకు వెళ్లాల్సిన రష్యా ఆయిల్ ట్యాంకర్లు భారత్కు మళ్లింపు.. కేంద్రం క్లారిటీ!
పశ్చిమాసియా యుద్ధం (Middle East war) నేపథ్యంలో చమురు సరఫరాపై తీవ్ర ప్రభావం పడుతున్న వేళ, చైనాకు వెళ్లాల్సిన రష్యా ఆయిల్ ట్యాంకర్లు అకస్మాత్తుగా భారత్ వైపు మళ్లినట్లు అంతర్జాతీయ మీడియాలో వస్తున్న కథనాలు తీవ్ర చర్చనీయాంశంగా మారాయి. అయితే, ఈ వార్తలపై భారత ప్రభుత్వం స్పందించింది.
రష్యా ట్యాంకర్ల మళ్లింపునకు సంబంధించి ప్రస్తుతానికి తమ వద్ద ఎలాంటి అధికారిక సమాచారం లేదని కేంద్ర నౌకాయాన మంత్రిత్వ శాఖ ప్రత్యేక కార్యదర్శి రాజేశ్ కుమార్ సిన్హా స్పష్టం చేశారు. మరోవైపు, ఇరాన్ యుద్ధం కారణంగా ఇబ్బందులు తలెత్తడంతో, పశ్చిమాసియా నుంచి నిలిచిపోయిన చమురు, గ్యాస్ సరఫరా లోటును భర్తీ చేసుకునేందుకు భారత్ రష్యా నుంచి దిగుమతులను రెట్టింపు చేసింది. ఇదే సమయంలో హార్ముజ్ జలసంధిలో దాదాపు 22 భారతీయ ఆయిల్ ట్యాంకర్లు చిక్కుకుపోయినట్లు కేంద్రం వెల్లడించింది.
అమెరికా గ్రీన్ సిగ్నల్.. దిశ మార్చుకున్న 'ఆక్వా టైటాన్'
తాజా షిప్-ట్రాకింగ్ డేటా ప్రకారం.. జనవరి చివరి వారంలో బాల్టిక్ సముద్రంలోని ఓ పోర్టు నుంచి రష్యా చమురు సంస్థ ఉరల్స్కు చెందిన 'ఆక్వా టైటాన్' నౌక బయలుదేరింది. వాస్తవానికి ఈ నౌక గమ్యస్థానం చైనాలోని రిఝో (Rizhao) పోర్టు. కానీ, అనూహ్యంగా దారి మళ్లించుకున్న ఈ ట్యాంకర్ మార్చి 21 నాటికి న్యూ మంగళూరు పోర్టుకు చేరుకోనుందని పలు కథనాలు పేర్కొన్నాయి.
ఉక్రెయిన్ యుద్ధం కారణంగా రష్యా చమురుపై పశ్చిమ దేశాలు ఆంక్షలు విధించిన సంగతి తెలిసిందే. అయితే, ప్రస్తుతం పశ్చిమాసియాలో యుద్ధం తీవ్రం కావడంతో రష్యా నుంచి చమురు కొనుగోళ్లకు అమెరికా తాత్కాలికంగా అనుమతించింది. అమెరికా గ్రీన్ సిగ్నల్ ఇచ్చిన కొద్ది రోజుల్లోనే ఈ నౌక చైనా నుంచి భారత్కు తన దిశను మార్చుకోవడం గమనార్హం.
వారం రోజుల్లోనే 3 కోట్ల బ్యారెళ్ల కొనుగోలు
గత నవంబరులో అమెరికాతో కుదిరిన వాణిజ్య ఒప్పందం కారణంగా రష్యా నుంచి చమురు కొనుగోళ్లను భారత్ గణనీయంగా తగ్గించింది. కానీ, ఇప్పుడు పశ్చిమాసియా సంక్షోభం దృష్ట్యా అమెరికా తాత్కాలిక మినహాయింపు ఇవ్వడంతో భారత్, చైనా, జపాన్, దక్షిణ కొరియా లాంటి దేశాలు మళ్లీ క్రూడాయిల్ కొనుగోళ్లను భారీగా పెంచాయి.
అమెరికా అనుమతి ఇచ్చిన వారం రోజుల వ్యవధిలోనే భారతీయ రిఫైనరీలు ఏకంగా 3 కోట్ల బ్యారెళ్ల రష్యా ముడి చమురును కొనుగోలు చేయడం పరిస్థితి తీవ్రతకు అద్దం పడుతోంది. డిమాండ్ అమాంతం పెరగడంతో రానున్న రోజుల్లో రష్యా ఆయిల్ ధరలు కూడా భారీగా పెరిగే అవకాశం ఉందని మార్కెట్ నిపుణులు అంచనా వేస్తున్నారు.
ఇండియాకు వరుస కడుతున్న ట్యాంకర్లు
ప్రముఖ డేటా అనలిటిక్స్ సంస్థ వోర్టెక్సా లిమిటెడ్ (Vortexa Ltd) నివేదిక ప్రకారం.. చైనాకు రష్యా ఆయిల్ తీసుకెళ్తున్న కనీసం ఏడు భారీ ట్యాంకర్లు మధ్యలోనే తమ గమ్యస్థానాలను మార్చుకుని నేరుగా భారత్ వైపు వస్తున్నాయి. అలాగే షిప్-ట్రాకింగ్ డేటా ప్రకారం, 'సుయెజ్మాక్స్ జౌజౌ ఎన్' (Suezmax Zouzou N) అనే మరో నౌక తదుపరి గమ్యస్థానం భారత్లోని గుజరాత్ సిక్కా పోర్టుగా నమోదైంది.
కజఖ్ సీపీసీ నుంచి ముడి చమురును లోడ్ చేసుకుని నల్ల సముద్రంలోని నోవోరోస్సిస్క్ నుంచి చైనాలోని రిఝో వైపు ప్రయాణించిన ఈ ట్యాంకర్, మార్చి ప్రారంభంలో అనూహ్యంగా భారత్ వైపు దిశ మార్చుకుందని కెప్లర్ (Kpler) సంస్థ వెల్లడించింది. ఈ నౌక మార్చి 25 నాటికి సిక్కా పోర్టుకు చేరుకుంటుందని అంచనా వేస్తున్నారు.
Also Read:
Tamil Nadu Elections: అమిత్ షాతో త్రిష చర్చలు? పొత్తుల వార్తలపై క్లారిటీ ఇచ్చిన విజయ్Flight Seat Selection: విమాన ప్రయాణికులకు గుడ్ న్యూస్
Supreme Court Orders: ఆర్బీఐ, కేంద్ర ప్రభుత్వానికి సుప్రీంకోర్టు కీలక ఆదేశాలు.. చట్టపరమైన వారసులకు న్యాయం జరిగేనా?
Oil and Gas Reserves: గ్యాస్, పెట్రోల్ కొరతపై కేంద్రం అలర్ట్
MP Raghav Chadha: మినిమమ్ బ్యాలెన్స్ వసూళ్లపై ఫైర్
Himayani Puri: ఎప్స్టీన్ కేసులో మంత్రి కుమార్తెకు ఊరట
