తెలంగాణలో అధికారంలో ఉన్న కాంగ్రెస్ పార్టీ క్షేత్రస్థాయిలో సంస్థాగతంగా మరింత పటిష్టమయ్యే దిశగా కీలక అడుగులు వేస్తోంది. చాలా కాలంగా వాయిదా పడుతూ వస్తున్న జిల్లా కాంగ్రెస్ కమిటీల (DCC) నియామక ప్రక్రియకు ఎట్టకేలకు మోక్షం లభించింది. తొలి విడతగా రాష్ట్రంలోని 14 జిల్లాలకు సంబంధించి పూర్తి స్థాయి కార్యవర్గ కమిటీలను టీపీసీసీ అధ్యక్షులు మహేష్ కుమార్ గౌడ్ ఈరోజు (గురువారం) ఉగాది పర్వదినాన్ని పురస్కరించుకుని అధికారికంగా ప్రకటించారు. ఈ నియామకాలతో తెలంగాణ కాంగ్రెస్ శ్రేణుల్లో సరికొత్త ఉత్సాహం నెలకొంది.
అసమ్మతి లేకుండా పక్కా కసరత్తు
గత పార్లమెంట్ ఎన్నికల సమయం నుంచే ఈ కమిటీల నియామకంపై పార్టీలో అంతర్గతంగా విస్తృత చర్చలు జరుగుతున్నాయి. అయితే, పదవుల పంపకాల్లో ఎలాంటి అసమ్మతి లేదా అసంతృప్తి తలెత్తకుండా ఉండేందుకు మహేష్ కుమార్ గౌడ్ నిన్న రాత్రి వరకు తీవ్రంగా కసరత్తు చేశారు.
అన్ని జిల్లాలకు సంబంధించి స్థానిక ఎమ్మెల్యేలు, నియోజకవర్గ ఇంచార్జీలతో ఆయన సుదీర్ఘంగా చర్చించి, అందరినీ సమన్వయపరుస్తూ ఈ జాబితాను ఫైనల్ చేశారు. గతంలో ఏర్పాటు చేసిన స్క్రీనింగ్ కమిటీ సూచనలను పాటిస్తూనే, పార్టీ కష్టకాలంలో ఉన్నప్పుడు జెండా మోసిన నాయకులకు, కష్టపడిన కార్యకర్తలకు ఈ కమిటీల్లో పెద్దపీట వేశారు.
పూర్తి స్థాయి జంబో కమిటీలు
ఈ ప్రకటనలో కేవలం జిల్లా అధ్యక్షులను మాత్రమే కాకుండా, జిల్లా స్థాయిలో పార్టీ యంత్రాంగాన్ని నడిపించే పూర్తి స్థాయి కార్యవర్గాన్ని నియమించడం గమనార్హం. ప్రతి జిల్లా కమిటీలో వైస్ ప్రెసిడెంట్లు, ప్రధాన కార్యదర్శులు, కార్యదర్శులు, జాయింట్ సెక్రటరీలతో పాటు ఎగ్జిక్యూటివ్ మెంబర్లను సైతం నియమించి జంబో కమిటీలను ఏర్పాటు చేశారు.
రాబోయే స్థానిక సంస్థల ఎన్నికలను, పార్టీ భవిష్యత్తు కార్యచరణను దృష్టిలో ఉంచుకునే అధిష్టానం ఈ నిర్ణయం తీసుకున్నట్లు స్పష్టమవుతోంది. రాష్ట్ర ప్రభుత్వ సంక్షేమ పథకాలను ప్రజల్లోకి బలంగా తీసుకెళ్లేలా ఈ కొత్త కమిటీలు పనిచేయాలని హైకమాండ్ ఆదేశించినట్లు సమాచారం. తొలి విడతలో 14 జిల్లాలను ప్రకటించగా, మిగిలిన జిల్లాల కమిటీలను కూడా అతి త్వరలోనే వెల్లడించనున్నట్లు పార్టీ వర్గాలు తెలిపాయి.
Also Read:
AP TS Weather Alert: తెలుగు రాష్ట్రాల్లో అకాల వర్షాలుTelangana Politics Latest News: శ్రీరామనవమి తర్వాత కొత్త పార్టీ ప్రకటించనున్న ఎమ్మెల్సీ కవిత
Moinabad Farmhouse Case: మొయినాబాద్ డ్రగ్స్ కేసు వేళ నటి హేమ సంచలన వ్యాఖ్యలు
TGSRTC Updates: ఆర్టీసీ ఉద్యోగులకు స్పెషల్ ఇంక్రిమెంట్ రద్దు
Jeevan Reddy: ఎమ్మెల్యే సంజయ్పై జీవన్ రెడ్డి ఫైర్
KTR Assembly Speech: కాంగ్రెస్ సర్కార్ పై కేటీఆర్ ఫైర్
