Ustaad Bhagat Singh Tickets: 'ఉస్తాద్' టికెట్ ధరల రగడ.. తెలంగాణ కంటే ఏపీలో భారీగా వడ్డింపు!
పవర్ స్టార్ పవన్ కల్యాణ్ సినిమా థియేటర్లలోకి వస్తుందంటే అభిమానులకు అదొక పెద్ద పండుగ. అందులోనూ తెలుగువారి కొత్త సంవత్సరం ఉగాదితో పాటు, ముస్లింల పవిత్ర పండుగ రంజాన్ రెండింటినీ కవర్ చేసేలా 'ఉస్తాద్ భగత్ సింగ్' మూవీ రాబోతుండటం సినీ ప్రేక్షకులకు డబుల్ ధమాకా లాంటిది. ముందుగా అనుకున్న షెడ్యూల్ కంటే ఒక వారం ముందే (మార్చి 19న) ప్రేక్షకుల ముందుకు వస్తున్న ఈ సినిమాపై భారీ అంచనాలు నెలకొన్నాయి.
అయితే, ఈ సినిమాకు సంబంధించిన టికెట్ల ధరల వ్యవహారం ఇప్పుడు రెండు తెలుగు రాష్ట్రాల్లో హాట్ టాపిక్గా మారింది. తెలంగాణతో పోలిస్తే ఆంధ్రప్రదేశ్లో టికెట్ రేట్లు భారీగా ఉండటమే ఈ విమర్శలకు ప్రధాన కారణం.
తెలంగాణలో అందుబాటు ధరలు
గతంలో ఆంధ్రప్రదేశ్లో జగన్ ప్రభుత్వ హయాంలో పవన్ సినిమాలను కారుచౌక ధరకు ప్రదర్శించేలా నిబంధనలు ఉండటం తీవ్ర వివాదాస్పదమైన విషయం తెలిసిందే. అయితే, ప్రస్తుతం రెండు రాష్ట్రాల్లో ప్రభుత్వాలతో సంబంధం లేకుండా చిత్ర నిర్మాణ సంస్థ మైత్రీ మూవీ మేకర్స్ అనుసరిస్తున్న తీరు చర్చనీయాంశంగా మారింది.
టికెట్ల ధరల పెంపు విషయంలో తెలంగాణలోని 90 రోజుల నిబంధనను సవాలు చేస్తూ మైత్రీ సంస్థ ఇటీవల సుప్రీంకోర్టును ఆశ్రయించి విజయం సాధించింది. అయినప్పటికీ, హైదరాబాద్ లాంటి సెంటర్లో రేట్లు విపరీతంగా పెంచితే ప్రేక్షకులపై ప్రతికూల ప్రభావం పడుతుందన్న ఉద్దేశంతో మేకర్స్ ఒక మోస్తరు పెంపుకే మొగ్గుచూపారు.
మల్టీప్లెక్స్లలో రూ.95, సింగిల్ స్క్రీన్లలో రూ.25 మాత్రమే పెంచేలా డిసైడ్ చేశారు. దీంతో తెలంగాణలో మల్టీప్లెక్స్ టికెట్ రూ.295గా, సింగిల్ స్క్రీన్ టికెట్ రూ.175గా అందుబాటులోకి వచ్చింది. సినిమాపై ఉన్న భారీ హైప్కు తోడు ఈ అందుబాటు ధరలు ఇక్కడ మంచి ఊపును తెచ్చాయి.
ఏపీలో వడ్డింపు.. మేకర్స్ తీరుపై విమర్శలు
తెలంగాణలో సానుకూల నిర్ణయం తీసుకున్న మేకర్స్, ఏపీ విషయానికి వచ్చేసరికి మాత్రం భారీగా వడ్డింపులకు వెళ్లడం వివాదానికి దారితీసింది. ఆంధ్రప్రదేశ్లో మల్టీప్లెక్స్లపై రూ.125, సింగిల్ స్క్రీన్లపై రూ.100 పెంచుకునేలా నిర్ణయం తీసుకున్నారు. దీంతో ఏపీలోని మల్టీప్లెక్స్లో రూ.200గా ఉన్న టికెట్.. తాజా పెంపుతో ఏకంగా రూ.325కు చేరింది.
అదే విధంగా సింగిల్ స్క్రీన్ థియేటర్లో రూ.100 పెంచడం ద్వారా టికెట్ ధర రూ.200లకు పెరిగింది. సామాన్య ప్రేక్షకుడిని దృష్టిలో ఉంచుకుని రెండు రాష్ట్రాల్లో ఒకేలాంటి ధరలను డిసైడ్ చేస్తే బాగుండేదన్న అభిప్రాయం వ్యక్తమవుతోంది.
పాలసీలు వేరైనా కనీసం పెంపు శాతంలోనైనా వ్యత్యాసం లేకుండా జాగ్రత్తలు తీసుకోవాల్సింది. తెలంగాణతో పోలిస్తే ఆంధ్రాలో పవన్ సినిమాకు ఈ స్థాయిలో టికెట్ల ధరలు ఎక్కువగా ఉండటాన్ని నెటిజన్లు, సినీ విశ్లేషకులు తీవ్రంగా తప్పుబడుతున్నారు.
