రోడ్డు మీద ప్రయాణం అంటే ప్రాణాలను అరచేతిలో పెట్టుకుని వెళ్లడమే అన్నట్లుగా మారిపోయింది నేటి పరిస్థితి. ఉదయం నవ్వుతూ ఇంట్లోంచి బయటకు వెళ్లిన వ్యక్తి, తిరిగి వస్తాడన్న గ్యారెంటీ లేదు. క్షణకాలంలో జరిగే రోడ్డు ప్రమాదాలు ఎన్నో కుటుంబాల్లో తీరని శోకాన్ని మిగులుస్తున్నాయి. అయితే ఇక్కడ సామాన్యుడు తెలుసుకోవాల్సిన అతిపెద్ద నగ్నసత్యం ఒకటి ఉంది.. ప్రమాదం జరిగిన తర్వాత ఆస్పత్రికి తీసుకెళ్లడంలో జరిగే ఆలస్యమే సగానికి పైగా మరణాలకు కారణం! ఆ మొదటి అరవై నిమిషాలు, అంటే 'గోల్డెన్ అవర్'లో వైద్యం అందితే ఏ నిరుపేదయినా బతికిపోతాడు. సరిగ్గా ఈ ప్రాణ సంకటాన్ని గుర్తించిన రేవంత్ రెడ్డి సర్కార్.. సామాన్యుడి ప్రాణాలకు భరోసా ఇస్తూ ఒక బృహత్తర పథకానికి శ్రీకారం చుట్టింది.
మరణాలను జయించే 'స్టేట్ ట్రామా కేర్ పాలసీ'
Telangana Introduces State Trauma Care Policy To Save Accident Victims : రాష్ట్రంలో నిత్యం ఎన్నో ఘోరమైన రోడ్డు ప్రమాదాలు జరుగుతున్నాయి. ఎంత త్వరగా వీలైతే అంత త్వరగా బాధితులకు చికిత్స అందిస్తేనే వారి ప్రాణాలను కాపాడగలం. కొన్నిసార్లు ప్రమాదం జరిగిన ప్రాంతం నుంచి ఆస్పత్రికి ఆలస్యంగా తీసుకుపోవడం వల్లే ఎందరో అభాగ్యులను కాపాడలేకపోయామని డాక్టర్లు ఆవేదన వ్యక్తం చేస్తున్నారు.
రోడ్డు ప్రమాద బాధితులకు మొదటి గంటలోనే చికిత్స అందించడాన్ని వైద్య పరిభాషలో 'గోల్డెన్ అవర్ ట్రీట్మెంట్' అంటారు. ఈ నేపథ్యంలోనే రోడ్డు ప్రమాదాల్లో గాయపడిన వారికి ఆ అత్యంత కీలకమైన గోల్డెన్ అవర్లో చికిత్స అందించడమే ఏకైక లక్ష్యంగా తెలంగాణ ప్రభుత్వం సరికొత్త 'స్టేట్ ట్రామా కేర్ పాలసీ'ని రూపొందించింది.
4 అంచెల రక్షణ వలయం.. ఆస్పత్రికి తీసుకెళ్లేలోపే చికిత్స!
ఈ అద్భుతమైన స్టేట్ ట్రామా కేర్ పాలసీలో భాగంగా.. తెలంగాణ రాష్ట్రవ్యాప్తంగా ఉన్న జాతీయ రహదారులపై అత్యాధునిక ట్రామా కేర్ సెంటర్లను ఏర్పాటు చేయనున్నట్లు సర్కార్ ఇప్పటికే స్పష్టమైన ప్రకటన చేసింది. ఇవి కేవలం సాధారణ సెంటర్లు కావు. బాధితుల ఆరోగ్య పరిస్థితిని బట్టి వారికి మెరుగైన చికిత్సను అతి తక్కువ సమయంలో అందించేందుకు ఏకంగా యాక్సిడెంట్ స్పాట్ నుంచి టెర్షియరీ కేర్ హాస్పిటల్ వరకు 4 అంచెల వ్యవస్థను పటిష్టం చేయనుంది. ఈ పకడ్బందీ నెట్వర్క్ ద్వారా బాధితులకు సరైన సమయంలో వైద్యం అందుతుందని ప్రభుత్వం ధీమా వ్యక్తం చేస్తోంది. ఈ ప్రాణదాత పాలసీని అతి త్వరలో అధికారికంగా ప్రకటించనున్నారు.
ప్రమాదం జరిగిన ప్రాంతం నుంచి పేషెంట్ల కండిషన్ను బట్టి వారికి నిమిషాల్లో చికిత్స అందించేలా ఈ ఫోర్ లెవల్ ట్రామా కేర్ నెట్వర్క్ను ప్లాన్ చేశారు. మొత్తం నాలుగు అంచెల్లో సేవలను విభజించి బృహత్తర ప్రణాళికలు సిద్ధం చేస్తున్నారు.
నాలుగో లెవెల్: ఇక్కడే అసలైన ప్రాణరక్షణ మొదలవుతుంది. ప్రమాదం జరిగిన వెంటనే ఘటనాస్థలానికి చేరుకునే 108 అంబులెన్స్ మొదటి రెస్పాండర్గా పనిచేస్తుంది. ఆ అంబులెన్స్లోనే ప్రాథమిక చికిత్స అందిస్తూ అత్యంత దగ్గర్లో ఉన్న ఆస్పత్రికి తరలిస్తారు. దీని కోసం ప్రతీ ట్రామా కేర్ సెంటర్కు ఒక ప్రత్యేక అంబులెన్స్ను ఏర్పాటు చేయనున్నారు.
మూడో లెవెల్: ప్రాథమిక చికిత్స అనంతరం.. జిల్లా ఆస్పత్రుల్లో కొత్తగా ఏర్పాటు చేయనున్న ట్రామా కేర్ సెంటర్లకు తరలించి బాధితులకు అత్యవసర చికిత్స అందిస్తారు.
రెండో లెవెల్: పరిస్థితి కాస్త విషమంగా ఉంటే.. జిల్లాల్లోని ప్రభుత్వ జనరల్ ఆస్పత్రుల్లో ట్రామా చికిత్సతో పాటు, ప్రాణాలు నిలిపే పెద్ద ఆపరేషన్లు చేస్తారు.
మొదటి లెవెల్: ఇక అత్యంత విషమంగా ఉన్న, చావుబతుకుల మధ్య పోరాడుతున్న కేసులను ఏమాత్రం ఆలస్యం చేయకుండా.. హైదరాబాద్లోని గాంధీ, ఉస్మానియా, నిమ్స్, త్వరలో ప్రారంభం కానున్న టిమ్స్ ఆస్పత్రులతో పాటు మన వరంగల్ ఎంజీఎం, సూపర్ స్పెషాలిటీ హాస్పిటల్లకు తరలించి అడ్వాన్స్డ్ ట్రీట్మెంట్ అందిస్తారు.
911 డెత్ స్పాట్స్ గుర్తింపు.. 35 కిలోమీటర్లలోపే ప్రాణదానం!
ఈ మహా ప్రణాళికను గుడ్డిగా అమలు చేయడం లేదు. ప్రస్తుతం రాష్ట్రంలోని హైవేలపై ఎక్కడ ఎక్కువ ప్రమాదాలు జరుగుతున్నాయో కచ్చితంగా తెలుసుకునేందుకు 108, ఆరోగ్యశ్రీ సంస్థలు కలిసి ఒక సమగ్రమైన సైంటిఫిక్ సర్వేను చేపట్టాయి. ఈ సర్వేలో రాష్ట్రవ్యాప్తంగా ఏకంగా 911 డెత్ బ్లాక్ స్పాట్స్ ఉన్నట్లు గుర్తించారు.
వీళ్లు గుర్తించిన ఈ బ్లాక్ స్పాట్స్ ఆధారంగానే కొత్తగా ఏర్పాటు చేయనున్న 74 ట్రామా కేర్ సెంటర్ల లొకేషన్లను పక్కాగా ఖరారు చేశారు. ఎక్కడ ప్రమాదం జరిగినా.. కేవలం 35 కిలోమీటర్లలోపే అత్యాధునిక చికిత్స అందించేలా ఈ నెట్వర్క్ను అత్యంత పకడ్బందీగా రూపొందించారు.
వరల్డ్ బ్యాంక్ నిధులు.. చైన్ సిస్టమ్తో సంజీవని!
ఈ భారీ ట్రామా కేర్ పాలసీ ప్రాజెక్టుకు ఏకంగా వరల్డ్ బ్యాంక్ ఆర్థిక సాయం అందించనుంది. మొత్తం 74 ట్రామా కేర్ సెంటర్లలో అత్యాధునిక మెడికల్ పరికరాలు, ప్రాణవాయువు పోసే వెంటిలేటర్లు, ఎమర్జెన్సీ థియేటర్లు అందుబాటులోకి రానున్నాయి. ఒక్కో ట్రామా కేర్ సెంటర్ను రూ. 5.3 కోట్లతో బ్రహ్మాండంగా ఏర్పాటు చేయనున్నారు.
రోడ్లపై ఎక్కడ ప్రమాదం జరిగినా నిమిషాల్లోనే అక్కడికి అంబులెన్స్ చేరుకోవడం, పేషెంట్ పరిస్థితిని బట్టి ఏ హాస్పిటల్కు తరలించాలి అనేది మొత్తం ఒక స్మార్ట్ చైన్ సిస్టమ్లా పనిచేయనుంది. ఈ విధానం అమలైతే రోడ్డు ప్రమాదాల్లో సరైన సమయంలో చికిత్స అందకుండా చనిపోతున్న అభాగ్యుల ప్రాణాలను కాపాడవచ్చని ప్రభుత్వ వర్గాలు స్పష్టం చేస్తున్నాయి.
నిజానికి రోడ్డు ప్రమాదంలో ప్రాణాలు పోవడం కన్నా, సమయానికి వైద్యం అందక పోయే ప్రాణాలే ఎక్కువ. ఈ 'స్టేట్ ట్రామా కేర్ పాలసీ' కాగితాలకే పరిమితం కాకుండా, అధికారుల నిర్లక్ష్యానికి బలికాకుండా.. క్షేత్రస్థాయిలో పకడ్బందీగా అమలైతే మాత్రం.. ఇది తెలంగాణ చరిత్రలో ఎన్నో వేల కుటుంబాలకు ఆయుష్షు పోసే అతిపెద్ద సంజీవనిలా మారుతుంది! మనం రోడ్డెక్కితే మన ప్రాణాలకు ఒక భరోసా ఉందన్న ధైర్యం సామాన్యుడికి కలగాలి. అదే ఈ ప్రభుత్వానికి అసలైన విజయం!
Also Read:
Liquor Price Hike: తెలంగాణలో పెరగనున్న మద్యం ధరలుHyderabad Land Scam: పేదోళ్ల ఇళ్లే కూలుస్తారా? పెద్దోళ్ల కబ్జాలు కనపడవా? హైడ్రాపై హరీష్ రావు ఫైర్!
Basara Temple Master Plan: బాసరకు రూ.225 కోట్లతో మహర్దశ!
Cyber Crime Hyderabad: టెకీకి 2.36 కోట్ల కుచ్చుటోపీ
Bhadrachalam Villages: భద్రాచలం ఆ ఐదు గ్రామాలు తెలంగాణకే.. అమిత్ షాకు తుమ్మల లేఖ!
