మీ బైక్కు పెట్రోల్ కొట్టించడానికి వెళ్తున్నారా? అయితే జేబులో ఇంకొన్ని వందల రూపాయలు అదనంగా పెట్టుకోండి! ఎక్కడో అమెరికా-ఇరాన్ మధ్య జరుగుతున్న యుద్ధం, ఉక్రెయిన్ పేలుస్తున్న బాంబులు.. రేపు ఉదయం మీరు కొనే పాలు, కూరగాయల ధరలను ఆకాశానికి తాకేలా చేయబోతున్నాయో తెలుసా? ఇదొక అంతర్జాతీయ చమురు సునామీ.. దీని దెబ్బకు ప్రతి సామాన్యుడి బడ్జెట్ బస్ స్టాండ్ కావడం ఖాయం!
ఆగిపోయిన చమురు గుండెకాయ.. హార్మూజ్ జలసంధి క్లోజ్!
పశ్చిమాసియాలో రగులుతున్న యుద్ధ జ్వాలలు యావత్ ప్రపంచాన్ని వణికిస్తున్నాయి. అమెరికా, ఇరాన్ మధ్య రాజుకున్న వైరం కారణంగా.. ప్రపంచ చమురు రవాణాకు గుండెకాయ లాంటి 'హార్మూజ్ జలసంధి' పూర్తిగా మూతపడింది.
మన దేశానికి అవసరమైన చమురులో 85 శాతం విదేశాల నుంచే వస్తుండగా.. అందులో 60 నుంచి 65 శాతం కేవలం ఈ జలసంధి గుండానే రావాలి. ఇప్పుడు ఆ దారి మూసుకుపోవడంతో దేశంలో భయంకరమైన చమురు సంక్షోభం తలెత్తింది. ఈ ఊహించని పరిణామం వల్లే కేంద్ర ప్రభుత్వం ఇటీవలే పెట్రోల్, డీజిల్ ధరలను లీటరుకు రూ. 3 మేర అమాంతం పెంచేసింది.
రష్యాపై ఉక్రెయిన్ పంజా.. మంటల్లో అతిపెద్ద రిఫైనరీ!
ఒకవైపు హార్మూజ్ జలసంధి మూతపడితే, మరోవైపు రష్యా-ఉక్రెయిన్ యుద్ధం చమురు మంటల్లో నెయ్యి పోసింది. రష్యాలోని రియాజాన్ ప్రాంతంలో ఉన్న భారీ చమురు శుద్ధి కర్మాగారంపై ఉక్రెయిన్ దళాలు ఆకస్మిక దాడులకు పాల్పడ్డాయి.
ఈ భీకర దాడులతో ఆ రిఫైనరీలో భారీ ఎత్తున మంటలు చెలరేగి నలుగురు ప్రాణాలు కోల్పోగా, పలువురు తీవ్రంగా గాయపడ్డారు. ఏటా ఏకంగా 17 మిలియన్ టన్నుల ముడి చమురును ప్రాసెస్ చేసే ఈ కర్మాగారం ధ్వంసం కావడంతో.. రష్యా నుంచి వచ్చే చమురు ఉత్పత్తి, సరఫరా వ్యవస్థలకు కోలుకోలేని గండి పడింది.
అమెరికా ఆంక్షల పిడుగు.. బెంబేలెత్తుతున్న మార్కెట్లు!
మూలిగే నక్కపై తాటికాయ పడ్డట్లు.. రష్యా నుంచి చమురు కొనుగోలు చేయడంపై అమెరికా తాజా ఆంక్షల పిడుగు వేసింది. గతంలో ఇచ్చిన తాత్కాలిక మినహాయింపులను ఇకపై పొడిగించే ప్రసక్తే లేదని తేల్చి చెప్పింది.
మార్చి, ఏప్రిల్ నెలల్లో రెండుసార్లు మినహాయింపులు ఇచ్చినా, ఈసారి మాత్రం కఠినంగా వ్యవహరించింది. హార్మూజ్ జలసంధి మూసివేతతో చమురు దొరక్క అల్లాడుతున్న భారత్, ఇండోనేషియా లాంటి దేశాలు మినహాయింపును పొడిగించాలని బతిమాలుకున్నా అమెరికా కనికరించలేదు. ఫలితంగా అంతర్జాతీయ మార్కెట్లో ముడి చమురు సరఫరాపై అమాంతం ఒత్తిడి పెరిగిపోయింది.
యుద్ధాలు జరుగుతున్నది ఎక్కడో సరిహద్దుల్లో అయినా.. అసలు ప్రభావం పడేది మాత్రం నేరుగా మన వంటగదిపైనే! హార్మూజ్ ఉద్రిక్తతలు, రిఫైనరీల ధ్వంసంతో అంతర్జాతీయంగా క్రూడ్ ఆయిల్ ధరలు ఆకాశాన్ని తాకడం ఖాయం. దీనివల్ల మన దేశంలో పెట్రోల్, డీజిల్, గ్యాస్ రేట్లు ఎన్నడూ లేని స్థాయిలో భగ్గుమంటాయి. ఇంధన ధరలు పెరిగితే రవాణా ఖర్చులు పెరిగిపోయి.. బియ్యం, పప్పుల నుంచి కూరగాయల వరకు నిత్యావసర సరుకుల ధరలన్నీ సామాన్యుడికి అందనంత ఎత్తుకు చేరుకుంటాయి. రాబోయే ఈ ద్రవ్యోల్బణ సునామీ నుంచి జేబును కాపాడుకోవాలంటే.. అనవసరపు ఖర్చులకు కళ్లెం వేసి పొదుపు పాటించడమే ఏకైక మార్గం!
