Iran Crisis: నాటో దేశాలపై డొనాల్డ్ ట్రంప్ తీవ్ర ఆగ్రహం.. మాకు ఎవరి సాయం అక్కర్లేదంటూ ఫైర్!
ఇరాన్తో జరుగుతున్న యుద్ధ పరిస్థితుల నేపథ్యంలో అమెరికా అధ్యక్షుడు డొనాల్డ్ ట్రంప్ తన మిత్రదేశాల తీరుపై తీవ్ర అసంతృప్తి, ఆగ్రహం వ్యక్తం చేశారు. అంతర్జాతీయ చమురు రవాణాకు అత్యంత కీలకమైన ‘హార్ముజ్ జలసంధి’ని (Strait of Hormuz) సురక్షితం చేయడానికి, దాన్ని తెరిపించడానికి మిత్రదేశాలు సహాయం చేయాలని ట్రంప్ పిలుపునిచ్చారు. అయితే, ఆయన అభ్యర్థనకు ఏ ఒక్క దేశం కూడా సానుకూలంగా స్పందించకపోవడంతో ట్రంప్ తీవ్ర స్థాయిలో విరుచుకుపడ్డారు.
ప్రపంచంలోనే అత్యంత శక్తివంతమైన దేశం మాది!
మంగళవారం ఈ పరిణామాలపై స్పందించిన డొనాల్డ్ ట్రంప్.. ఈ వ్యూహాత్మక జల మార్గాన్ని రక్షించుకోవడానికి అమెరికాకు ఎవరి సహాయం అవసరం లేదని తేల్చి చెప్పారు.
"మాకు ఎవరి మద్దతు, సహాయం అవసరం లేదు. ప్రపంచంలోనే అత్యంత శక్తివంతమైన దేశం మాది. ప్రపంచంలోనే అత్యంత పవర్ఫుల్ సైన్యం అమెరికా సొంతం" అని ట్రంప్ స్పష్టం చేశారు.
నాటో (NATO) కూటమిలో ఉన్నప్పటికీ సంక్షోభ సమయంలో అమెరికాకు మిత్రదేశాలు సహాయం చేయకపోవడాన్ని ఆయన తీవ్రంగా తప్పుబట్టారు. యూకే (UK) నుంచి మాత్రమే తమకు కొంత సహాయం అందిందని, అది కూడా చాలా ఆలస్యంగా జరిగిందని ఆయన అసహనం వ్యక్తం చేశారు.
ట్రంప్ అభ్యర్థనను తిరస్కరించిన యూరప్ దేశాలు
ట్రంప్ ఇచ్చిన పిలుపును జర్మనీ, స్పెయిన్, ఇటలీలతో సహా అమెరికాకు చెందిన పలు కీలక భాగస్వామ్య దేశాలు సున్నితంగా తిరస్కరించాయి. ఆ ప్రాంతానికి తమ నౌకాదళ బలగాలను పంపే తక్షణ ప్రణాళికలు ఏవీ తమ వద్ద లేవని ఆ దేశాలు స్పష్టం చేశాయి.
ముఖ్యంగా జర్మనీ ఈ విషయంలో అమెరికా, ఇజ్రాయెల్ తీరును తప్పుబట్టింది. ఇరాన్పై యుద్ధాన్ని ప్రారంభించే ముందు ఆ రెండు దేశాలు తమకు కనీస సమాచారం కూడా అందించలేదని, అందుకే తాము ఈ యుద్ధంలో జోక్యం చేసుకోబోమని జర్మనీ స్పష్టం చేసింది.
