PAK vs BAN: బిగ్ స్క్రీన్ చూసి రివ్యూ అడిగారా.. ఢాకా వన్డేలో అంపైర్ నిర్ణయంపై భగ్గుమన్న పాకిస్థాన్!
బంగ్లాదేశ్ పర్యటనలో ఉన్న పాకిస్థాన్ క్రికెట్ జట్టుకు వివాదాలు ఏమాత్రం వెన్నొదలడం లేదు. ఢాకా వేదికగా ఆదివారం పాకిస్థాన్-బంగ్లాదేశ్ మధ్య జరిగిన మూడో వన్డే మ్యాచ్ ముగింపు అత్యంత నాటకీయంగా, వివాదాస్పదంగా మారింది. మ్యాచ్ చివరి ఓవర్లో అంపైర్ తీసుకున్న ఒక నిర్ణయం, ఆ తర్వాత బంగ్లాదేశ్ జట్టు తీసుకున్న రివ్యూ కారణంగా రెండు జట్ల ఆటగాళ్ల మధ్య మైదానంలోనే తీవ్ర వాగ్వాదం తలెత్తింది. ఇప్పటికే ఈ సిరీస్లోని రెండో వన్డే మ్యాచ్లో పాక్ బ్యాటర్ సల్మాన్ అలీ అఘా రనౌట్ వ్యవహారం తీవ్ర వివాదానికి దారితీయగా, ఇప్పుడు ఏకంగా డీఆర్ఎస్ (DRS) నిబంధనల ఉల్లంఘనపై పాక్ క్రికెట్ బోర్డు ఏకంగా ఐసీసీకే ఫిర్యాదు చేసే స్థాయికి పరిస్థితి వెళ్లింది.
చివరి ఓవర్లో అసలేం జరిగిందంటే..
ఈ ఉత్కంఠభరితమైన మ్యాచ్లో పాకిస్తాన్ విజయానికి చివరి ఓవర్లో 14 పరుగులు అవసరమయ్యాయి. ఆ నిర్ణయాత్మక ఓవర్ను బంగ్లాదేశ్ స్పిన్నర్ రిషాద్ హుస్సేన్ వేశాడు. తొలి రెండు బంతులకు రిషాద్ ఒక్క పరుగు కూడా ఇవ్వకుండా బ్యాటర్లను కట్టడి చేశాడు. మూడో బంతికి రెండు పరుగులు రాగా, నాలుగో బంతికి పరుగేమీ రాలేదు. ఇక ఐదో బంతిని రిషాద్ లెగ్ స్టంప్ దిశగా సంధించగా.. స్ట్రైకింగ్లో ఉన్న పాక్ బ్యాటర్ షాహీన్ ఆఫ్రిది దానిని ఫ్లిక్ ఆడేందుకు ప్రయత్నించాడు. కానీ షాట్ కనెక్ట్ కాకపోవడంతో బంతి నేరుగా కీపర్ చేతుల్లోకి వెళ్లింది. దీన్ని ఫీల్డ్ అంపైర్ వెంటనే వైడ్గా ప్రకటించాడు. అయితే, వికెట్ కీపర్ లిట్టన్ దాస్ సూచన మేరకు బంగ్లా కెప్టెన్ నజ్ముల్ హుస్సేన్ శాంటో రివ్యూ తీసుకున్నాడు. సరిగ్గా ఇక్కడే అసలు వివాదం మొదలైంది.
బిగ్ స్క్రీన్ చూసే రివ్యూ కోరారా?
కెప్టెన్ అభ్యర్థన మేరకు రివ్యూను పరిశీలించిన థర్డ్ అంపైర్, ఆ బంతి వైడ్ కాదని, బ్యాటర్ ప్యాడ్ను తాకుతూ వెళ్లిందని నిర్ధారించి ఫీల్డ్ అంపైర్ నిర్ణయాన్ని వెనక్కి తీసుకున్నాడు. ఈ ఘటన తర్వాత పాకిస్థాన్ ప్లేయర్స్ తీవ్ర అభ్యంతరం వ్యక్తం చేశారు. బంగ్లా ఆటగాళ్లు మైదానంలోని బిగ్ స్క్రీన్పై రీప్లే చూసిన తర్వాతే రివ్యూకి వెళ్లారని పాక్ కెప్టెన్, ఆటగాళ్లు ఆరోపించారు. క్రికెట్ నిబంధనల ప్రకారం ఫీల్డ్ అంపైర్ నిర్ణయం ప్రకటించిన 15 సెకన్లలోపే డీఆర్ఎస్ (DRS) కోరాల్సి ఉంటుంది. కానీ, నిర్ణీత సమయం ముగిసిన తర్వాత, అందులోనూ బిగ్ స్క్రీన్ పై రీప్లే చూశాక అంపైర్ రివ్యూకు అనుమతించడంపై పాక్ శిబిరం తీవ్ర అసహనం వ్యక్తం చేసింది. ఇది ముమ్మాటికీ మ్యాచ్ నిబంధనలకు విరుద్ధమని అంపైర్లతో వాగ్వాదానికి దిగింది.
ఐసీసీకి పీసీబీ ఫిర్యాదు
ఫీల్డ్ అంపైర్ల తీరుపై తీవ్ర ఆగ్రహంతో ఉన్న పాకిస్థాన్ క్రికెట్ బోర్డు (PCB), ఈ విషయంపై మ్యాచ్ రిఫరీతో పాటు నేరుగా అంతర్జాతీయ క్రికెట్ మండలి (ICC)కి అధికారికంగా ఫిర్యాదు చేసినట్లు సమాచారం. డీఆర్ఎస్ టైమర్ ముగిసిన తర్వాత అంపైర్లు రివ్యూకు ఎలా అనుమతిస్తారని పీసీబీ ప్రశ్నిస్తోంది. వరుసగా రెండు మ్యాచ్ల్లో తమ జట్టుకు అంపైర్ల నిర్ణయాల వల్ల తీవ్ర నష్టం వాటిల్లిందని పాక్ వాదిస్తోంది. ఈ వివాదంపై ఐసీసీ విచారణ జరిపి ఎలాంటి నిర్ణయం తీసుకుంటుందోనని ఇప్పుడు క్రికెట్ ప్రపంచం ఎంతో ఆసక్తిగా ఎదురుచూస్తోంది.
