తెలంగాణ రాజకీయ ముఖచిత్రంపై పార్టీ ఫిరాయింపుల పర్వం మరోసారి తీవ్ర ప్రకంపనలు సృష్టిస్తోంది. అసెంబ్లీ వేదికగా సాగిన ఆయారాం గయారాంల రాజకీయ చదరంగం ఇప్పుడు నేరుగా న్యాయస్థానం మెట్లెక్కింది. ఖైరతాబాద్ ఎమ్మెల్యే దానం నాగేందర్కు సంబంధించి శాసనసభ స్పీకర్ గడ్డం ప్రసాద్ కుమార్ ఇటీవల ఇచ్చిన సంచలన తీర్పు.. ఇప్పుడు రాష్ట్ర రాజకీయాల్లో అతిపెద్ద వివాదంగా మారింది.
దానం నాగేందర్ అసలు పార్టీనే మారలేదంటూ స్పీకర్ ఇచ్చిన 'క్లీన్ చిట్' రాజ్యాంగ విరుద్ధమంటూ, ఆ తీర్పును సవాల్ చేస్తూ భారతీయ జనతా పార్టీ శాసనసభాపక్ష నేత, ఎమ్మెల్యే ఏలేటి మహేశ్వర్ రెడ్డి తెలంగాణ హైకోర్టు గడప తొక్కారు. ఈ అనూహ్య పరిణామంతో అటు కాంగ్రెస్ శిబిరంలో, ఇటు గులాబీ దళంలో ఒక్కసారిగా ఉత్కంఠ రేగింది.
కండువా మార్చారు.. ఎంపీగా పోటీ చేశారు.. అయినా పార్టీ మారలేదా?
అసలు ఈ రాజకీయ రణరంగానికి బీజం పడింది గత సాధారణ ఎన్నికల ఫలితాల తర్వాతే. బీఆర్ఎస్ పార్టీ అధినేత కేసీఆర్ ఇచ్చిన బీ-ఫామ్ తో ఖైరతాబాద్ బరిలో నిలిచిన దానం నాగేందర్.. కారు గుర్తుపై ఘన విజయం సాధించారు. కానీ, రాష్ట్రంలో అధికార మార్పిడి జరగగానే ఆయన అనూహ్యంగా కారు దిగి, హస్తం గూటికి చేరారు.
బహిరంగంగానే కాంగ్రెస్ కండువా కప్పుకోవడమే కాకుండా, ఏకంగా సికింద్రాబాద్ పార్లమెంట్ నియోజకవర్గం నుంచి అధికార కాంగ్రెస్ పార్టీ అభ్యర్థిగా బరిలోకి దిగి ఎంపీ ఎన్నికల్లో సైతం పోటీ చేశారు. ఒక పార్టీ గుర్తుపై గెలిచి, మరో పార్టీ కండువా కప్పుకుని వేరొక ఎన్నికల్లో పోటీ చేసిన దానం నాగేందర్పై తక్షణమే అనర్హత వేటు వేయాలని డిమాండ్ చేస్తూ బీజేపీ నేత ఏలేటి మహేశ్వర్ రెడ్డి గతంలోనే స్పీకర్ గడ్డం ప్రసాద్ కుమార్కు ఫిర్యాదు చేశారు.
స్పీకర్ తీర్పును సవాల్ చేస్తూ.. హైకోర్టులో పిటిషన్
చట్టసభల సాక్షిగా ఫిరాయింపు ఆరోపణలు ఎదుర్కొంటున్న పది మంది ఎమ్మెల్యేల అనర్హత పిటిషన్లపై సుదీర్ఘ విచారణ జరిపిన స్పీకర్ గడ్డం ప్రసాద్ కుమార్.. అనూహ్యమైన తీర్పును వెలువరించారు. దానం నాగేందర్ అసలు పార్టీ మారలేదని, ఆయనపై వచ్చిన ఫిరాయింపు ఆరోపణల్లో ఎలాంటి వాస్తవం లేదంటూ ఏకంగా క్లీన్ చిట్ ఇవ్వడం రాజకీయ వర్గాలను విస్మయానికి గురిచేసింది.
కళ్లెదుటే పార్టీ కండువా మార్చుకుని, ఎన్నికల బరిలో నిలిచిన వ్యక్తికి స్పీకర్ ఇలాంటి తీర్పు ఇవ్వడాన్ని జీర్ణించుకోలేని ఏలేటి మహేశ్వర్ రెడ్డి.. ఈ తీర్పును రాజ్యాంగ స్ఫూర్తికి విరుద్ధంగా పేర్కొంటూ తెలంగాణ హైకోర్టులో పిటిషన్ దాఖలు చేశారు. న్యాయపోరాటానికి సిద్ధమైన ఆయన, ఈ పిటిషన్లో అసెంబ్లీ స్పీకర్ను, ఎమ్మెల్యే దానం నాగేందర్ను ప్రధాన ప్రతివాదులుగా చేర్చారు.
ఎల్లుండి చీఫ్ జస్టిస్ బెంచ్ ముందుకు.. నరాలు తెగే ఉత్కంఠ
ఫిరాయింపుల చట్టం, రాజ్యాంగ విలువల పునాదులను కదిలిస్తున్న ఈ కీలక పిటిషన్పై తెలంగాణ హైకోర్టు ప్రధాన న్యాయమూర్తి (చీఫ్ జస్టిస్) ధర్మాసనం ఎల్లుండి (సోమవారం) విచారణ జరపనుంది. ఒకవైపు స్పీకర్ నిర్ణయాన్ని న్యాయస్థానాలు సమీక్షించవచ్చా అన్న రాజ్యాంగబద్ధమైన ప్రశ్న.. మరోవైపు కళ్లెదుటే జరిగిన ఫిరాయింపు వాస్తవాలు.. ఈ రెండింటి నడుమ హైకోర్టు ధర్మాసనం ఎలాంటి వైఖరి తీసుకుంటుందోనని యావత్ రాష్ట్రం ఊపిరి బిగబట్టి చూస్తోంది.
ఈ హైవోల్టేజ్ విచారణలో పిటిషనర్ ఏలేటి మహేశ్వర్ రెడ్డి తరపు న్యాయవాదులు, అటు స్పీకర్ నిర్ణయాన్ని సమర్థించేలా ప్రభుత్వ న్యాయవాదులు, అలాగే దానం నాగేందర్ తరపు న్యాయకోవిదులు తమ వాదనలను బలంగా వినిపించేందుకు అస్త్రశస్త్రాలు సిద్ధం చేసుకుంటున్నారు. ఈ తీర్పు రాష్ట్రంలోని మిగతా ఫిరాయింపు ఎమ్మెల్యేల భవిష్యత్తును కూడా శాసించే అవకాశం ఉండటంతో అంతటా ఉత్కంఠ నెలకొంది.
Also Read:
Jeevan Reddy Rebellion : కాంగ్రెస్ కోటలో రగులుతున్న అసమ్మతి జ్వాల.. జీవన్ రెడ్డి తిరుగుబాటు బావుటా!గల్ఫ్ యుద్ధం సెగ: సింగరేణి గనుల్లో ఆగుతున్న బొగ్గు గుండెచప్పుడు.. మహా యంత్రాలకు మరణశాసనం!
Moinabad Drugs Case: ఫామ్హౌస్లో పేలిన తూటాలు.. సిమ్లా స్టోరీలో హైదరాబాద్ ట్విస్ట్!
Petrol Diesel Crisis in Hyderabad: హైదరాబాద్ బంకుల్లో 'నో స్టాక్' బోర్డులు.. ముంచుకొస్తున్న పెట్రోల్ ముప్పు!
Telangana Congress: స్థానిక పోరుకు సై.. ఉగాది వేళ 14 జిల్లాల కాంగ్రెస్ కమిటీల ప్రకటన!
