అది హైదరాబాద్ శివారు ప్రాంతం. ఉదయం పూట ఎప్పట్లాగే తమ పనులకు వెళ్లేందుకు వాహనదారులు హడావిడిగా బయలుదేరారు. కానీ, దారిలో వారికి ఊహించని షాక్ ఎదురైంది. వరుసగా ఏ పెట్రోల్ బంక్ దగ్గర చూసినా దడ పుట్టించే 'నో స్టాక్' (No Stock) బోర్డులే దర్శనమిస్తున్నాయి. అసలు ఏం జరుగుతుందో అర్థంకాక వాహనదారులు బంకుల ముందు పడిగాపులు కాస్తున్నారు. బంక్ సిబ్బందిని అడిగితే నిర్లిప్తమైన సమాధానం. పశ్చిమాసియాలో రగులుతున్న యుద్ధం సెగలు నేరుగా మన హైదరాబాద్ వీధులను తాకుతున్నాయనడానికి ఈ దృశ్యాలే సజీవ సాక్ష్యం. గల్ఫ్ దేశాల నుంచి రావాల్సిన ముడిచమురు దిగుమతులు గణనీయంగా పడిపోవడంతో, డిమాండ్కు తగ్గ సప్లయ్ లేక రాబోయే రోజుల్లో ఇంధన ధరలు భారీగా పెరిగే ప్రమాదం పొంచి ఉంది.
మొదలైన మంట.. పెరిగిన 'పవర్ పెట్రోల్'
మండే ఎండలకు తోడు ఇప్పుడు పెట్రోల్ ధరల మంట కూడా సామాన్యుడిని దహించివేసేలా ఉంది. ఉరుము లేని పిడుగులా ఇప్పటికే 'పవర్ పెట్రోల్' (Power Petrol) ధరపై లీటరుకు ఏకంగా రెండు రూపాయల 26 పైసలు పెంచేశారు. ఇదే అంశంపై తెలంగాణ పెట్రోలియం డీలర్స్ ప్రెసిడెంట్ అమరేందర్ రెడ్డి తీవ్ర ఆందోళన వ్యక్తం చేశారు.
రానున్న రోజుల్లో సాధారణ పెట్రోల్, డీజిల్ ధరలు కూడా కచ్చితంగా పెరిగే అవకాశం స్పష్టంగా కనిపిస్తోందని ఆయన కుండబద్దలు కొట్టారు. అంతర్జాతీయ మార్కెట్లో డాలర్ విలువ అనూహ్యంగా పెరగడం, బ్యారెల్ ముడిచమురు ధర కూడా ఆకాశాన్నంటడంతో ప్రభుత్వ కజానాపై పెనుభారం పడనుందని, దాన్ని భర్తీ చేసేందుకు ధరల పెంపు అనివార్యమని ఆయన విశ్లేషించారు.
ఆయిల్ కంపెనీల డబుల్ గేమ్.. మూతపడుతున్న బంకులు
గడిచిన రెండు మూడేళ్లుగా దేశంలో పెట్రోల్, డీజిల్ ధరలు స్థిరంగానే ఉన్నాయి. 2022 దీపావళి సమయంలో డిమాండ్ పెరిగినప్పుడు, ప్రజలపై భారం పడకూడదని ప్రభుత్వం ఎక్సైజ్ డ్యూటీని కూడా తగ్గించింది. కానీ ఇప్పుడు సీన్ మొత్తం రివర్స్ అయింది. నిన్నమొన్నటి వరకు అడగకపోయినా బలవంతంగా అప్పు (క్రెడిట్) ఇచ్చిన ఆయిల్ కంపెనీలు.. ఇప్పుడు అర్ధాంతరంగా ఆ క్రెడిట్ను నిలిపివేశాయి. పైగా పాత బకాయిలతో పాటు, ముందుగానే అడ్వాన్స్ కడితేనే స్టాక్ పంపుతామని డీలర్ల మెడపై కత్తి పెడుతున్నాయి.
రాత్రికి రాత్రే అంత భారీ మొత్తంలో డబ్బులు తీసుకురావడం సాధ్యం కాకపోవడంతో, రాష్ట్రవ్యాప్తంగా దాదాపు 40 శాతం పెట్రోల్ బంకులు ఇప్పటికే మూతపడ్డాయి. తమ డబ్బులు వసూలు చేసుకునేందుకు ఆయిల్ కంపెనీలే ఉద్దేశపూర్వకంగా ఈ కృత్రిమ కొరతను సృష్టిస్తున్నాయని అమరేందర్ రెడ్డి తీవ్ర ఆరోపణలు చేశారు. అడ్వాన్స్ డబ్బులు చెల్లించి బుకింగ్ చేసుకున్న డీలర్లకు కూడా డిమాండ్కు సరిపడా స్టాక్ను కంపెనీలు సరఫరా చేయలేకపోతున్న దారుణమైన పరిస్థితి నెలకొంది.
భయంతో పరుగులు.. ప్రజలకు అవగాహన ఏదీ?
ఒకవైపు బంకుల్లో స్టాక్ లేదు.. మరోవైపు ఏ క్షణమైనా పెట్రోల్ దొరకదేమో అన్న భయంతో ప్రజలు బంకులకు పోటెత్తుతున్నారు. వంద రూపాయలు పోయించుకునే సామాన్యుడు సైతం భయంతో ఫుల్ ట్యాంక్ చేయించుకుంటున్నాడు. ఈ పానిక్ బయ్యింగ్ (Panic Buying) వల్లే ఉన్న కొద్దిపాటి స్టాక్ కూడా క్షణాల్లో ఖాళీ అయిపోతూ ఈ కొరత మరింత తీవ్రరూపం దాల్చుతోంది.
ఈ క్లిష్ట సమయంలో పానిక్ అవ్వొద్దని, ఇంధన వినియోగంపై ప్రజలకు ప్రభుత్వం తక్షణం అవగాహన కల్పిస్తేనే ఈ షార్టేజ్ను కొంతమేరకైనా అరికట్టవచ్చని నిపుణులు సూచిస్తున్నారు. ఏదేమైనా.. ముంచుకొస్తున్న ఈ పెట్రోల్ ముప్పు సామాన్యుడి జేబుకు భారీ చిల్లులు పెట్టడం మాత్రం ఖాయంగా కనిపిస్తోంది.
Also Read:
Trump Shocking Comments: ఓవల్ ఆఫీసులో పిన్ డ్రాప్ సైలెన్స్.. జపాన్ ప్రధాని ముందు ట్రంప్ పేల్చిన 'పెర్ల్ హార్బర్' బాంబు!US vs Iran War: పల్టీ కొట్టిన ట్రంప్ వ్యూహం.. ఇరాన్ చేతిలో అమెరికాకు ఊహించని పరాభవం!
Hormuz Strait Crisis: హార్ముజ్ కోసం ఆరు దేశాల కూటమి.. ఇరాన్కు చెక్ పెట్టేందుకు రంగంలోకి!
Middle East Crisis: ఖతార్ గ్యాస్ ప్లాంట్పై ఇరాన్ భీకర దాడి.. భారత్కు తప్పని ఇంధన కష్టాలు!
Global Internet Outage Fears : సముద్ర గర్భంలో కేబుళ్ల కట్టింగ్ కు ఇరాన్ ప్లాన్.. కోవిడ్ కంటే భయంకరమైన పరిస్థితులు!
