మధ్యప్రాచ్యంలో రగులుతున్న యుద్ధం ప్రపంచ ఇంధన మార్కెట్లను తీవ్రంగా అతలాకుతలం చేస్తోంది. అమెరికా, ఇజ్రాయెల్ జరిపిన దాడులకు ప్రతీకారంగా ఇరాన్ ఇప్పుడు గల్ఫ్ దేశాల్లోని చమురు, గ్యాస్ నిలయాలే లక్ష్యంగా విరుచుకుపడుతోంది. తాజాగా ఖతార్లోని ప్రపంచంలోనే అతిపెద్ద గ్యాస్ ప్లాంట్ 'రాస్ లఫాన్' (Ras Laffan) పై ఇరాన్ భీకర క్షిపణి దాడికి పాల్పడింది. ఈ దెబ్బతో అక్కడ గ్యాస్ ఉత్పత్తి రాత్రికి రాత్రే నిలిచిపోయింది. అమెరికా, రష్యా, ఆస్ట్రేలియాతో సమానంగా గ్యాస్ ఉత్పత్తి చేసే ఖతార్పై ఈ దాడి జరగడం అంతర్జాతీయంగా పెను ప్రకంపనలు సృష్టిస్తోంది.
హార్ముజ్ జలసంధిలో చిక్కుకున్న 700 నౌకలు
ఫిబ్రవరి 28న ప్రారంభమైన ఈ యుద్ధం ఇప్పుడు మూడో వారంలోకి అడుగుపెట్టింది. వేలాది మంది అమాయకులు ప్రాణాలు కోల్పోతుండగా, ప్రపంచ ఇంధన సరఫరా గొలుసు పూర్తిగా దెబ్బతింది. ప్రపంచ చమురు సరఫరాలో దాదాపు ఐదో వంతు (20 శాతం) వాటా కలిగిన హార్ముజ్ జలసంధి (Strait of Hormuz) ఇప్పుడు పూర్తిస్థాయి యుద్ధ క్షేత్రంగా మారిపోయింది. దీంతో సముద్ర మార్గంలో ఓడల రాకపోకలు పూర్తిగా స్తంభించిపోయాయి. ఏకంగా 700 సరుకు రవాణా నౌకలు మధ్యప్రాచ్య తీరాల్లోనే చిక్కుకుపోవడంతో ప్రపంచవ్యాప్తంగా ఇంధన ధరలు ఆకాశాన్నంటుతున్నాయి.
భారత్కు భారీ గ్యాస్ కోత.. ప్రత్యామ్నాయాలపై దృష్టి
ఈ గల్ఫ్ సంక్షోభం భారతదేశంపై అత్యంత తీవ్రమైన ప్రభావాన్ని చూపుతోంది. మన దేశం తన రోజువారీ గ్యాస్ అవసరాల్లో 50 శాతం విదేశాల నుంచే దిగుమతి చేసుకుంటోంది. అందులో ఏకంగా 20 శాతం గ్యాస్ ఒక్క ఖతార్ నుంచే వస్తోంది. ఇప్పుడు ఖతార్లో ఉత్పత్తి ఆగిపోవడంతో భారత్కు అందాల్సిన గ్యాస్ సరఫరాలో భారీ కోత పడింది. భారతదేశానికి ప్రతిరోజూ 189 మిలియన్ క్యూబిక్ మీటర్ల గ్యాస్ అవసరం కాగా, మన దగ్గర అందులో సగం మాత్రమే ఉత్పత్తి అవుతోంది.
ఈ విపత్కర పరిస్థితుల దృష్ట్యా భారత్ తన గ్యాస్ వినియోగాన్ని గణనీయంగా తగ్గించుకోవాల్సిన అవసరం ఏర్పడిందని నిపుణులు హెచ్చరిస్తున్నారు. ముఖ్యంగా పరిశ్రమలు, విద్యుత్ ఉత్పత్తి రంగాల్లో గ్యాస్ వాడకాన్ని నియంత్రించక తప్పని పరిస్థితి నెలకొంది. యుద్ధం కారణంగా దిగుమతులకు తీవ్ర ఆటంకం కలగడంతో, భారత ప్రభుత్వ సంస్థలు ఇప్పుడు ప్రత్యామ్నాయ మార్గాలపై దృష్టి సారించాయి. గ్యాస్ కొరతను అధిగమించేందుకు ఇతర దేశాల నుంచి అత్యవసరంగా కొనుగోలు చేయడానికి ముమ్మర ప్రయత్నాలు ప్రారంభించాయి.
Also Read:
Global Internet Outage Fears : సముద్ర గర్భంలో కేబుళ్ల కట్టింగ్ కు ఇరాన్ ప్లాన్.. కోవిడ్ కంటే భయంకరమైన పరిస్థితులు!Middle East Crisis: ఇంధన క్షేత్రాలే లక్ష్యంగా ఇరాన్ దాడులు.. రంగంలోకి దిగిన ట్రంప్
Qatar vs Iran: 24 గంటల్లో దేశం విడిచి వెళ్లండి.. ఇరాన్ అధికారులకు ఖతార్ వార్నింగ్
Israel vs Iran War: ఎక్కడున్నా వదిలిపెట్టం.. మోజ్తాబా ఖమేనీకి ఇజ్రాయెల్, ట్రంప్ వార్నింగ్
Indians Evacuated: స్వదేశానికి 2.44 లక్షల మంది.. తరలింపుపై కేంద్రం కీలక ప్రకటన
Dubai Economic Crisis: కుప్పకూలుతున్న దుబాయ్ ఆర్థిక వ్యవస్థ
India Condemns Pakistan: పవిత్ర రంజాన్ మాసంలో ఈ పైశాచికం ఏంటి? పాక్ వైమానిక దాడిపై భారత్ ఫైర్
