తినడానికి తిండి లేదు.. దేశం నిండా అప్పులే! అయినా సరే దాయాది పాకిస్థాన్కు ఉగ్రవాదంపై ఉన్న ప్రేమ, ఆయుధాలపై ఉన్న వ్యామోహం ఏమాత్రం చావలేదు. పీకల్లోతు కష్టాల్లో ఉండి కూడా భారత్పై కుట్రలు పన్నేందుకు ఆ దేశం సిద్ధమవుతోందన్న తాజా పరిణామాలు ఇప్పుడు సంచలనంగా మారాయి.
ఆపరేషన్ సింధూర్.. ప్రతీకారం మర్చిపోయిందా?
గతేడాది ఏప్రిల్ 22న పహల్గామ్లో 26 మంది అమాయక టూరిస్టులను పాక్ ఉగ్రవాదులు పొట్టనబెట్టుకున్న తీరు ప్రతి భారతీయుడి రక్తాన్ని మరిగించింది. ఆ నెత్తుటి ధారలకు ప్రతీకారంగానే మే 7 నుంచి 10వ తేదీ వరకు భారత సైన్యం 'ఆపరేషన్ సింధూర్' (Operation Sindoor) చేపట్టి దాయాది గుండెల్లో నిద్రపోయింది. పాకిస్థాన్, పీఓకే పరిధిలోని 9 కీలక ఉగ్ర స్థావరాలతో పాటు, వారి ఎయిర్ బేస్లను సైతం నేలమట్టం చేసింది. వందలాది ఉగ్రమూకలను మట్టుబెట్టి భారత సైన్యం తన సత్తా ఏంటో ప్రపంచానికి చూపించింది.
ఎంత కొట్టినా బుద్ధి మారని పాము!
ఎంత దారుణంగా దెబ్బతిన్నా పాకిస్థాన్ తీరు మాత్రం ఎంత కొట్టినా చావని పాములాగే తయారైంది. భారత సైన్యం ఎప్పటికప్పుడు గట్టి వార్నింగ్ ఇస్తున్నప్పటికీ, సరిహద్దుల్లో అలజడులు సృష్టించేందుకు ఆ దేశం కుట్రలు పన్నుతూనే ఉంది. ఈ క్రమంలో, అంతర్జాతీయ ద్రవ్య నిధి (IMF) మద్దతుతో కూడిన ఆర్థిక సంస్కరణల ముసుగులో పాకిస్థాన్ తన సైనిక వ్యయాన్ని భారీగా పెంచుకునేందుకు ప్లాన్ గీయడం విస్మయానికి గురిచేస్తోంది.
అడుక్కునేది అన్నం కోసం.. కొనేది ఆయుధాలు!
రాబోయే 2026-27 ఆర్థిక సంవత్సరానికి గాను పాకిస్థాన్ తన రక్షణ బడ్జెట్ను ఏకంగా 100 బిలియన్ పాకిస్థానీ రూపాయల (PKR) మేర పెంచాలని ప్రతిపాదనలు సిద్ధం చేసింది. దీంతో ఆ దేశ రక్షణ వ్యయం ప్రస్తుత ఆర్థిక సంవత్సరంలోని PKR 2.564 ట్రిలియన్ల నుంచి ఏకంగా PKR 2.665 ట్రిలియన్లకు ఎగబాకనుంది. అప్పుల ఊబిలో కూరుకుపోయిన పాకిస్థాన్ వార్షిక వ్యయంలో.. అప్పుల చెల్లింపుల తర్వాత ఆర్మీకే ఈ స్థాయిలో నిధులు కుమ్మరిస్తుండటం వారి వక్రబుద్ధికి అద్దం పడుతోంది.
ఐఎంఎఫ్ ప్యాకేజీలు.. అవినీతి ఆడిట్లు
పాకిస్థాన్కు ఐఎంఎఫ్ మంజూరు చేసిన 7 బిలియన్ డాలర్ల 'ఎక్స్టెండెడ్ ఫండ్ ఫెసిలిటీ', అలాగే 1.4 బిలియన్ డాలర్ల 'రెసిలియన్స్ అండ్ సస్టైనబిలిటీ ఫెసిలిటీ'ల సమీక్షల అనంతరం విడుదల చేసిన నివేదిక ఆధారంగా ఈ రక్షణ బడ్జెట్ పెంపును ప్రతిపాదించారు. ఈ తాజా బడ్జెట్లో ఫెడరల్ ఆదాయాల్లో 13.5 శాతం వృద్ధిని అంచనా వేస్తున్నారు. దీని ద్వారా మొత్తం ఆదాయం PKR 17.144 ట్రిలియన్లకు (గత ఏడాది కంటే PKR 2 ట్రిలియన్లు అదనం) చేరుకుంటుందని లెక్కలు వేస్తున్నారు.
మరోవైపు ఐఎంఎఫ్ పాక్కు కఠిన నిబంధనలు కూడా విధించింది. జూన్ 2027 నాటికి అన్ని ఫెడరల్, ప్రాంతీయ చెల్లింపులను పూర్తిగా డిజిటలైజ్ చేయాలని ఆదేశించింది. ఈ ఏడాది చివరికల్లా టాప్ 10 అత్యంత అవినీతి ప్రభుత్వ సంస్థలను గుర్తించి ఆడిట్ చేయాలని, అలాగే ప్రాంతీయ అవినీతి నిరోధక విభాగాలను బలోపేతం చేయాలని స్పష్టం చేసింది.
ఆకలితో జనం.. అప్రమత్తమైన భారత్
ఆదాయాన్ని పెంచుకునేందుకు పాక్ ప్రభుత్వం ఒకవైపు ఈ సంస్కరణలు చేపడుతున్నా.. ఆ దేశ జనాభాలో దాదాపు 40 శాతం మంది ఇప్పటికే తీవ్రమైన ఆర్థిక కష్టాలతో అల్లాడిపోతున్నారు. వచ్చే నెలలోనే అధికారిక బడ్జెట్ రానున్న నేపథ్యంలో, ఈ ప్రతిపాదనలను ఫైనల్ చేయడానికి ఐఎంఎఫ్ బృందం ప్రస్తుతం పాకిస్థాన్లోనే పర్యటిస్తోంది.
దేశ ప్రజలు తిండి గింజలు లేక ఏడుస్తుంటే, ఉగ్రవాదాన్ని పెంచి పోషించే మిలిటరీకే పెద్దపీట వేస్తున్న పాకిస్థాన్ తీరు.. ఆ దేశం తన పతనానికి తానే ఎలా గోతి తవ్వుకుంటోందో స్పష్టం చేస్తోంది. పాకిస్థాన్ రక్షణ వ్యయం పెంచుతున్న నేపథ్యంలో భారత నిఘా వర్గాలు, సైన్యం అత్యంత అప్రమత్తమయ్యాయి. దాయాది దేశపు కవ్వింపు చర్యలను డేగకళ్లతో గమనిస్తున్నాయి. పాక్ ఇంకోసారి తోక జాడిస్తే, 'ఆపరేషన్ సింధూర్'ను మించిన మరో భారీ వినాశనం తప్పదు!
