బంకుల్లో పెట్రోల్ ధరలు చూసి భయపడుతున్నారా? పశ్చిమాసియా ఉద్రిక్తతలతో దేశంలో ముంచుకొస్తున్న చమురు సంక్షోభం మీ జేబుకు చిల్లు పెడుతోందా? సరిగ్గా ఇలాంటి విపత్కర పరిస్థితుల్లోనే సామాన్యుడికి ఊరటనిచ్చే ఒక చారిత్రక అడుగు న్యూఢిల్లీలో పడబోతోంది. మన చిరకాల మిత్రుడు, రష్యా అధ్యక్షుడు వ్లాదిమిర్ పుతిన్ భారత పర్యటన ఇప్పుడు యావత్ ప్రపంచ దృష్టిని ఆకర్షిస్తోంది.
ఢిల్లీ వేదికగా పుతిన్, మోదీ వ్యూహం
ఈ ఏడాది సెప్టెంబర్ 12, 13 తేదీల్లో న్యూఢిల్లీలో జరగనున్న 18వ బ్రిక్స్ శిఖరాగ్ర సమావేశానికి రష్యా అధ్యక్షుడు వ్లాదిమిర్ పుతిన్ హాజరుకానున్నారు. ఈ విషయాన్ని రష్యా అధికారిక కార్యాలయం క్రెమ్లిన్ స్వయంగా ధృవీకరించింది.
గతేడాది డిసెంబర్లో జరిగిన 23వ వార్షిక శిఖరాగ్ర సదస్సుకు హాజరైన పుతిన్, ఏడాది తిరగకముందే రెండోసారి భారత్కు రావడం ఈ పర్యటన ప్రాధాన్యతను చెబుతోంది. విదేశాంగ మంత్రి ఎస్. జైశంకర్ పర్యవేక్షణలో మన దేశం అధ్యక్షతన జరుగుతున్న ఈ సదస్సులో పుతిన్, ప్రధాని మోదీ ప్రత్యేకంగా ద్వైపాక్షిక చర్చలు జరపనున్నారు.
ఆగిపోయిన చమురు.. బెంబేలెత్తుతున్న భారత్
ప్రస్తుతం పశ్చిమాసియా అగ్నిగుండంలా మారుతోంది. యుద్ధ వాతావరణం నెలకొనడంతో ఇరాన్ అత్యంత కీలకమైన హార్మూజ్ జలసంధిని మూసివేసింది. దీనివల్ల ప్రపంచ వాణిజ్య వ్యవస్థ పూర్తిగా అతలాకుతలం అవుతోంది.
మన దేశానికి అవసరమైన చమురులో 85 శాతం విదేశాల నుంచే వస్తుంది. అందులో 60 నుంచి 65 శాతం కేవలం ఈ హార్మూజ్ జలసంధి గుండానే మనకు చేరాలి. ఆ మార్గం మూసుకుపోవడంతో దేశంలో ఊహించని పెట్రోల్, డీజిల్ సంక్షోభం తలెత్తింది.
రష్యా చమురే మనకు శ్రీరామరక్ష!
ఈ ఇంధన కష్టాల నుంచి దేశాన్ని గట్టెక్కించేందుకే మోదీ, పుతిన్ సమావేశం అత్యంత కీలకంగా మారింది. సంక్షోభ సమయంలో రష్యా నుంచి ముడి చమురు, ఎరువులు, కోకింగ్ కోల్ సరఫరాను నిరంతరాయంగా కొనసాగించడంపై ఈ సదస్సులో ప్రధానంగా చర్చించనున్నారు.
అంతేకాకుండా, అంతర్జాతీయ ఆంక్షలను దాటుకుని స్థానిక కరెన్సీలైన రూపాయి-రూబుల్ విధానంలో వాణిజ్యాన్ని మరింత బలోపేతం చేసే దిశగా అడుగులు పడనున్నాయి. విశేష వ్యూహాత్మక భాగస్వామ్యాన్ని మరింత ముందుకు తీసుకెళ్తూ, ఈ ఏడాది చివర్లో ప్రధాని మోదీ కూడా రష్యా పర్యటనకు వెళ్లనున్నట్లు ఆ దేశ విదేశాంగ మంత్రి సెర్గీ లావ్రోవ్ అధికారికంగా ప్రకటించారు.
కష్టకాలంలో ఆదుకునేవాడే నిజమైన స్నేహితుడు అనడానికి రష్యా మరోసారి సజీవ సాక్ష్యంగా నిలబడబోతోంది! పశ్చిమాసియా సంక్షోభంతో ఇంధన ధరలు భగ్గుమంటున్న వేళ, రష్యాతో స్థానిక కరెన్సీలో చమురు ఒప్పందాలు కుదుర్చుకోవడమే సామాన్యుడి బడ్జెట్ను కాపాడే ఏకైక బ్రహ్మాస్త్రం. డాలర్ ఆధిపత్యాన్ని కాదని, భారత్-రష్యా తమ బంధాన్ని మరింత బలోపేతం చేసుకుంటే.. రేపు ఏ దేశం హార్మూజ్ జలసంధిని మూసివేసినా మన పెట్రోల్ బంకులు ఖాళీ కావు!
Also Read:
US Iran Conflict: ఇరాన్పై దాడిని ఆపిన డొనాల్డ్ ట్రంప్.. అసలేం జరిగింది?దాయాది దేశంలో ఇంధన సునామీ.. ఈ-బైక్ల వైపు పాక్ ప్రజల పరుగులు
భారత్కు భారీ షాక్: చమురు దిగుమతులపై అమెరికా తాజా ఆంక్షల పిడుగు
Moscow Drone Strike : మాస్కోపై డ్రోన్ల వాన.. భారతీయుడి మృతి!
Ebola Virus Outbreak: ఆఫ్రికాలో ఎబోలా కల్లోలం
