శ్వేతసౌధాన్ని సైతం తన దర్యాప్తుతో గడగడలాడించి, అమెరికా చట్టాల ముందు ఎంతటి వారైనా తలవంచాల్సిందేనని నిరూపించిన ఎఫ్బీఐ మాజీ డైరెక్టర్ రాబర్ట్ ముల్లర్.. తన 81 ఏళ్ల వయసులో శాశ్వత నిద్రలోకి జారుకున్నారు. గత కొంతకాలంగా అనారోగ్యంతో పోరాడుతున్న ఆ నిశ్శబ్ద యోధుడు శుక్రవారం రాత్రి తుదిశ్వాస విడిచినట్లు ఆయన కుటుంబ సభ్యులు కన్నీటి పర్యంతమవుతూ అధికారికంగా ప్రకటించారు. ఒక దర్యాప్తు అధికారి మరణిస్తే దేశమంతా నివాళులు అర్పిస్తున్న వేళ.. డొనాల్డ్ ట్రంప్ మాత్రం తనదైన శైలిలో అత్యంత క్రూరంగా, ఘాటుగా స్పందించిన తీరు ఇప్పుడు ప్రపంచవ్యాప్తంగా పెను సంచలనంగా మారింది.
"అతను చనిపోయినందుకు సంతోషంగా ఉంది".. కట్టలు తెంచుకున్న ట్రంప్ ద్వేషం
వియత్నాం వీరుడు.. 9/11 దాడుల తర్వాత ఎఫ్బీఐ రథసారథి
న్యూయార్క్ నగరంలో జన్మించిన రాబర్ట్ ముల్లర్ జీవితం ఒక హాలీవుడ్ సినిమాను తలపిస్తుంది. యువకుడిగా ఉన్నప్పుడే వియత్నాం యుద్ధంలో మెరైన్ ఆఫీసర్గా బరిలోకి దిగి, శత్రువుల తూటాలను ఎదుర్కొని 'పర్పుల్ హార్ట్' లాంటి అత్యున్నత సైనిక పురస్కారాలను అందుకున్న సాహసి ఆయన.
2001 సెప్టెంబర్ 11న అమెరికాపై జరిగిన ఉగ్రవాద దాడుల తర్వాత ఎఫ్బీఐ రూపురేఖలను సమూలంగా మార్చేసిన ఘనత ముల్లర్కే దక్కుతుంది. కేవలం దేశీయ నేరాలకే పరిమితమైన దర్యాప్తు సంస్థను, ఉగ్రవాద నిరోధక శక్తిగా మార్చేందుకు ఆయన కఠిన నిర్ణయాలు తీసుకున్నారు. ఏకంగా 2,000 మంది ఏజెంట్లను జాతీయ భద్రత కోసం కేటాయించి అమెరికా నిఘా వ్యవస్థను ఉక్కుకోటలా మార్చారు.
శ్వేతసౌధాన్ని వణికించిన 448 పేజీల నివేదిక
రాబర్ట్ ముల్లర్ జీవితంలో అత్యంత సవాలుతో కూడిన, వివాదాస్పదమైన ఘట్టం 2017లో మొదలైంది. స్పెషల్ కౌన్సెల్గా బాధ్యతలు చేపట్టిన ఆయన, అత్యంత శక్తివంతమైన అధ్యక్ష పీఠంపై ఉన్న ట్రంప్కు, రష్యాకు మధ్య ఉన్న చీకటి బంధంపై ఏకంగా రెండేళ్ల పాటు అత్యంత గోప్యంగా విచారణ జరిపారు.
ఆయన రాత్రింబవళ్లు శ్రమించి రూపొందించిన 448 పేజీల చారిత్రక నివేదిక అప్పట్లో సృష్టించిన ప్రకంపనలు అన్నీ ఇన్నీ కావు. ట్రంప్ బృందానికి, రష్యాకు మధ్య సంబంధాలు ఉన్నాయని ఆ నివేదికలో కుండబద్దలు కొట్టినప్పటికీ, వారు కుట్రకు పాల్పడ్డారనడానికి చట్టపరమైన బలమైన ఆధారాలు లేవని ఆయన స్పష్టం చేశారు. అయితే, న్యాయ ప్రక్రియను అడ్డుకునేందుకు ట్రంప్ తీవ్రంగా ప్రయత్నించారని ముల్లర్ చేసిన వ్యాఖ్యలు అమెరికా అధ్యక్షుడినే భయంతో వణికించాయి.
చరిత్రలో నిలిచిపోయే శకం.. రాజకీయాలకు అతీతుడు
ఎఫ్బీఐ చరిత్రలో జె. ఎడ్గార్ హూవర్ తర్వాత అత్యంత ఎక్కువ కాలం డైరెక్టర్గా పని చేసిన రెండో శక్తిమంతమైన వ్యక్తిగా ముల్లర్ రికార్డు సృష్టించారు. జార్జ్ డబ్ల్యూ బుష్ హయాంలో నియమితులైన ఆయన నిబద్ధతను చూసి, ఆ తర్వాతి అధ్యక్షుడు బరాక్ ఒబామా స్వయంగా కోరి మరీ ముల్లర్ పదవీ కాలాన్ని పొడిగించడం ఆయన నిష్పక్షపాత పనితీరుకు సజీవ సాక్ష్యం.
ఎవరెన్ని ఒత్తిళ్లు తెచ్చినా రాజకీయాలకు అతీతంగా, చట్టమే ధ్యేయంగా పనిచేసిన రాబర్ట్ ముల్లర్ మృతితో అమెరికా దర్యాప్తు చరిత్రలో ఒక అసాధారణ, నిజాయితీతో కూడిన శకం శాశ్వతంగా ముగిసిపోయింది.
Also Read:
Global Oil Crisis 2026 : నెత్తురోడుతున్న పశ్చిమాసియాలో చమురు చదరంగం.. ఇరాన్ నల్లబంగారం వైపు భారత్ చూపు!Trump Ultimatum: 48 గంటల్లో ఆ దారి తెరవకపోతే ఇరాన్ అంధకారమే.. అగ్రరాజ్యం భీకర డెడ్లైన్!
Iran vs US War : అబద్ధాల పునాదులపై అమెరికా భవంతి.. నాడు వియత్నాం, నేడు ఇరాన్.. ట్రంప్ కు అరాఘ్చి భీకర కౌంటర్!
Global Espionage War: ఉక్రెయిన్ కు అమెరికా సాయం ఆపితే.. ఇరాన్ కు మేం ఆపుతాం.. రష్యా డీల్ నిజమేనా?
Kharg Island : పశ్చిమాసియాలో డొనాల్డ్ ట్రంప్ సరికొత్త వ్యూహం.. ఇరాన్ గుండెకాయ 'ఖర్గ్ ద్వీపం'పై అగ్రరాజ్యం గురి!
