Global Trade Crisis: వాణిజ్య నౌకలకు ఇంధన కష్టాలు.. ప్రపంచీకరణకు ముప్పుగా మారిన ఫ్యూయల్ ఆయిల్ కొరత!
అంతర్జాతీయ మార్కెట్లో ముడి చమురు ధరలు పెరిగినప్పుడల్లా మనందరి దృష్టి కేవలం పెట్రోల్, డీజిల్ రేట్ల పెరుగుదల పైనే ఉంటుంది. ప్రస్తుతం అంతర్జాతీయ మార్కెట్లో ముడి చమురు బ్యారెల్కు సుమారు వంద డాలర్ల వద్ద ట్రేడవుతోంది. అయితే, ఇక్కడ అసలు ప్రమాదం ముడి చమురు ధరలతో కాదు, శుద్ధి కర్మాగారాల్లో మిగిలిపోయే 'ఫ్యూయల్ ఆయిల్' కొరతతో పొంచి ఉందని ఆర్థిక నిపుణులు తీవ్రంగా హెచ్చరిస్తున్నారు. అత్యంత చౌకైన ఈ ఇంధనమే ప్రపంచవ్యాప్తంగా సరుకు రవాణా చేసే భారీ నౌకలకు ప్రధాన ప్రాణాధారం కావడంతో, దీని కొరత ఇప్పుడు మొత్తం ప్రపంచ వాణిజ్యాన్ని, గ్లోబల్ సప్లై చెయిన్ను స్తంభింపజేసే ప్రమాద స్థాయికి చేరింది.
ముడి చమురు నుంచి పెట్రోల్, డీజిల్, విమాన ఇంధనం లాంటి ప్రధాన ఉత్పత్తులను తీసేసిన తర్వాత అట్టడుగున మిగిలిపోయేదే ఈ ఫ్యూయల్ ఆయిల్. సాధారణంగా దీనిని బారెల్ బాటమ్ గా పరిగణించినప్పటికీ, వేలాది టన్నుల సరుకును మోసుకెళ్లే భారీ కంటైనర్ షిప్స్ నడవడానికి ఇదే ప్రధాన ఇంధనం. అందుకే దీనిని ప్రపంచీకరణకు అత్యంత కీలకమైన శక్తి వనరుగా భావిస్తారు. ఈ ఇంధన కొరతపై ప్రపంచంలోనే అతిపెద్ద షిప్పింగ్ కంపెనీలలో ఒకటైన ఏపీ మోలర్-మేయర్స్క్ సంస్థ చీఫ్ ఎగ్జిక్యూటివ్ ఆఫీసర్ విన్సెంట్ క్లర్క్ స్పందిస్తూ పరిస్థితి మరింత తీవ్రమయ్యే ప్రమాదం ఉందని ఆందోళన వ్యక్తం చేశారు. తక్షణమే ప్రత్యామ్నాయ చర్యలు తీసుకోకపోతే ఆసియాలోని ప్రధాన పోర్టులలో ఇంధన నిల్వలు అడుగంటిపోతాయని ఆయన స్పష్టం చేశారు.
ప్రస్తుతం ప్రపంచంలోని ప్రధాన బంకరింగ్ హబ్ లుగా పేరొందిన సింగపూర్, యూఏఈలోని ఫుజైరా ప్రాంతాలు ఇప్పటికే తీవ్రమైన ఫ్యూయల్ ఆయిల్ షార్టేజ్ ను ఎదుర్కొంటున్నాయి. దీని ప్రభావంతో సింగపూర్లో ఈ ఇంధన ధర బ్యారెల్కు సుమారు 140 డాలర్లకు చేరుకోగా, ఫుజైరాలో ఏకంగా 160 డాలర్ల వరకు పెరిగిపోయింది. అంతేకాకుండా కాలుష్య రహిత ఎన్విరాన్మెంట్ ఫ్రెండ్లీ రకాల ఫ్యూయల్ ఆయిల్ ధరలు బ్యారెల్ కు 175 డాలర్ల వరకు పెరిగినట్లు మార్కెట్ వర్గాలు చెబుతున్నాయి. ఈ అకస్మాత్తు సంక్షోభానికి ప్రధాన కారణం పశ్చిమాసియా ఘర్షణల నేపథ్యంలో 'హార్మూజ్ జలసంధి' సముద్ర మార్గం మూసివేయబడటమే. గల్ఫ్ దేశాలైన సౌదీ అరేబియా, కువైట్, యూఏఈలోని రిఫైనరీల నుంచి ప్రపంచానికి వెళ్లే ఇంధన చమురు సరఫరాలో ఈ మార్గందే కీలక పాత్ర. ఇంటర్నేషనల్ ఎనర్జీ ఏజెన్సీ లెక్కల ప్రకారం ప్రపంచవ్యాప్తంగా వర్తకం చేసే ఫ్యూయల్ ఆయిల్లో సుమారు ఇరవై శాతం ఈ హార్మూజ్ జలసంధి ప్రాంతం నుంచే వస్తుంది.
ప్రస్తుతానికి అమెరికా, యూరప్ ప్రాంతాల నుంచి ఆసియాకు ఫ్యూయల్ ఆయిల్ను షిప్పింగ్ ద్వారా అత్యవసరంగా తరలించి కొంతవరకు పరిస్థితిని నెట్టుకొస్తున్నారు. అయితే, ఒకవేళ ఈ ఇంధన సంక్షోభం గనుక ఎక్కువ కాలం కొనసాగితే కంటైనర్ షిప్స్ కు ఇంధన సరఫరా తగ్గిపోయి, అంతర్జాతీయంగా సరుకుల రవాణా నిలిచిపోతుందని విశ్లేషకులు హెచ్చరిస్తున్నారు. దీని ప్రభావం వల్ల ప్రపంచవ్యాప్తంగా నిత్యావసరాలు, ఎలక్ట్రానిక్స్ సహా అన్ని వస్తువుల సరఫరా దెబ్బతిని, ద్రవ్యోల్బణం (ఇన్ఫ్లేషన్) దారుణంగా పెరిగే ప్రమాదం ఉందని ఆర్థిక నిపుణులు భావిస్తున్నారు.
